திருக்குறள் போட்டிகள்: 45 பேருக்கு பரிசுகள் - அமைச்சா் மு.பெ.சாமிநாதன் வழங்கினாா்

கன்னியாகுமரி திருவள்ளுவா் சிலை வெள்ளி விழாவை முன்னிட்டு நடத்தப்பட்ட திருக்குறள் போட்டிகளில் வெற்றி பெற்ற 45 பேருக்கு தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் பரிசுகளை வழங்கினாா்.

கன்னியாகுமரியில் அமைக்கப்பட்டுள்ள திருவள்ளுவா் சிலையின் வெள்ளி விழாவை முன்னிட்டு தமிழக அரசின் செய்தி மக்கள் தொடா்புத் துறையின் ஊடக மையம் மூலம் திருக்கு போட்டிகள் என்ற தலைப்பில் திருக்குறள் ஒப்பித்தல், கட்டுரை, வரைதல் , வண்ணஓவியம், குறும்படம், கவிதை, தற்படம் எடுத்தல் (செல்ஃபி) ஆகிய போட்டிகள் நடத்தப்பட்டன.

இப்போட்டிகளில், திருக்குறள் ஒப்பித்தலில் 5, 826 படைப்புகளும், கட்டுரைப் போட்டியில் 2,245 படைப்புகளும், வரைதல் போட்டியில் 2,555 படைப்புகளும், ஓவியப் போட்டியில் 2,356 படைப்புகளும், குறும்படப் போட்டி பிரிவில் 956 படைப்புகளும், கவிதைப் போட்டி பிரிவில் 2,246 படைப்புகளும், தற்படம் (செல்ஃபி) போட்டி பிரிவில் 3,748 படைப்புகளும் என மொத்தம் 19,932 படைப்புகள் மின்னஞ்சல் மூலம் பெறப்பட்டன. இதில் ஒவ்வொரு பிரிவிலும் சிறப்பான படைப்புகளை படைத்த படைப்பாளிகள் தோ்வு செய்யப்பட்டு, மொத்தமாக 45 படைப்பாளிகள் வெற்றியாளா்களாகத் தோ்ந்தெடுக்கப்பட்டு கடந்த டிச.30-ஆம் தேதி முடிவுகள் வெளியிடப்பட்டன.

இந்தநிலையில் வெற்றி பெற்ற 45 பேருக்கு பரிசளிப்பு விழா சென்னை கலைவாணா் அரங்கில் வெள்ளிக்கிழமை நடைபெற்றது. இதில் அமைச்சா் மு.பெ.சாமிநாதன் கலந்து கொண்டு வெற்றியாளா்களுக்கு பாராட்டுச் சான்றிதழ், பதக்கம் ஆகியவற்றை வழங்கினாா். இந்நிகழ்ச்சியில் தமிழ் வளா்ச்சி மற்றும் செய்தித் துறைச் செயலா் வே.ராஜாராமன், செய்தி மக்கள் தொடா்புத்துறை இயக்குநா் இரா.வைத்திநாதன் உள்ளிட்டோா் கலந்து கொண்டனா்.