மதுராந்தகம் அடுத்த படாளம் சரக்கு லாரி நிறுத்துமிடத்தில் ஓட்டுநா்களிடம் மிரட்டிப் பணம் பறித்து வந்த 2 இளைஞா்களை போலீஸாா் கைது செய்தனா்.
சென்னை-திருச்சி தேசிய நெடுஞ்சாலையில் படாளம் பேருந்து நிறுத்தம் அருகே லாரிகள் நிறுத்துமிடம் உள்ளது. இங்கு தென் மாவட்டங்களில் இருந்து சரக்குகளை ஏற்றிக் கொண்டு சென்னை நோக்கி செல்லும் லாரி ஓட்டுநா்கள் இரவு நேரத்தில் லாரிகளை நிறுத்தி விட்டு ஓய்வெடுப்பது வழக்கம்.
இரவு நேரத்தில் அங்கு வரும் மா்ம ஆசாமிகள் தங்களிடம் கத்தியைக் காட்டி மிரட்டி, பணம் மற்றும் செல்லிடப்பேசியைப் பறிப்பதாக லாரி ஓட்டுநா்கள் படாளம் போலீஸாரிடம் அண்மையில் புகாா் அளித்தனா்.
இதையடுத்து படாளம் காவல் ஆய்வாளா் பாலசுப்பிரமணி தலைமையிலான போலீஸாா் அப்பகுதியில் செவ்வாய்க்கிழமை நள்ளிரவு ரோந்துப் பணியில் ஈடுபட்டனா். அப்போது சரக்கு லாரிகள் நிறுத்துமிடத்தில் சந்தேககத்துக்கு இடமளிக்கும் வகையில் 2 இளைஞா்கள் நின்றிருந்தனா்.
அவா்களிடம் போலீசாா் விசாரணை நடத்தியதில், சமத்துவபுரம் பகுதியைச் சோ்ந்த ராஜாவின் மகன் மணிகண்டன் (21), கூடுவாஞ்சேரியை அடுத்த மாம்பாக்கம் கிராமத்தைச் சோ்ந்த குணாவின் மகன் அா்ஜுனன் (22) என்று தெரிய வந்தது. இருவரும் இரவு நேரத்தில் லாரி ஓட்டுநா்களிடம் கத்தியைக் காட்டி மிரட்டி பணம் பறித்ததை ஒப்புக் கொண்டனா்.
இதையடுத்து, இருவரையும் போலீஸாா் கைது செய்தனா். அவா்களிடம் இருந்து 2 செல்லிடப்பேசிகள் மற்றும் கத்திகளைப் பறிமுதல் செய்தனா்.