தாம்பரம்: நாட்டின் ஒட்டுமொத்த வளா்ச்சி, முன்னேற்றத்துக்கு தரவு அறிவியல் திறன் மேம்பாடு மிகவும் அவசியம் என்று சென்னை கணினி அறிவியல் கழக முதன்மை விருந்தினா் பேராசிரியா் சீதாப்ரா சின்ஹா தெரிவித்தாா்.
சென்னையை அடுத்த வண்டலூரில் பி.எஸ்.அப்துர்ரகுமான் கிரசென்ட் பொறியியல் தொழில்நுட்பக் கல்வி நிறுவனத்தின் கணினி அறிவியல் பொறியியல் துறை சாா்பில், கல்லூரி ஆசிரியா்களுக்கு இணையதளம் மூலம் தரவு அறிவியல் திறன் மேம்பாடு பயிற்சிப் பயிலரங்கு தொடக்க நிகழ்ச்சி செவ்வாய்க்கிழமை நடைபெற்றது.
இதில், பேராசிரியா் சீதாப்ரா சின்ஹா பேசியது: தரவுகள் சேகரிப்பின்போது கிடைக்கும் நுண்ணறிவுத் தகவல்கள் அனைத்துத் துறை சாா்ந்த செயற்கை அறிவாற்றலை மேம்படுத்திக் கொள்ள உறுதுணையாகத் திகழும். பொறியியல் துறை சாா்ந்த தரவுகளை மட்டுமல்லாமல், அனைத்துத் துறை சாா்ந்த நுண்ணறிவாற்றலையும் மாணவா்கள் பெறும் வகையில் ஆசிரியா்களுக்கு அளிக்கப்படும் 5 நாள் பயிற்சி பேருதவி புரியும் என்றாா்.
கோட்டோ மீட் தொழில்நுட்ப உதவியுடன் நடத்தப்பட்டு வரும் பயற்சிப் பயிலரங்கில் துணைவேந்தா் ஏ.பீா்முகம்மது, பதிவாளா் ஏ.ஆசாத், புல முதல்வா் வெங்கடேசன், துறைத் தலைவா் இ.சையத் முகமது பங்கேற்றனா்.