மதுராந்தகம்: மதுராந்தகத்தை அடுத்த சின்னகொளம்பாக்கம் கற்பக விநாயகா மருத்துவக் கல்லூரி மற்றும் ஆராய்ச்சி மையத்தில், எய்ட்ஸ் நோயால் பாதிக்கப்பட்ட நபா்களுக்கு வாழ்நாள் முழுவதும் இலவசமாக கூட்டு மருத்துவ சிகிச்சை மையத்தை மருத்துவம் மற்றும் மக்கள் நலவாழ்வுத் துறை அமைச்சா் மா.சுப்பிரமணியன் புதன்கிழமை தொடக்கி வைத்தாா்.
தமிழகத்தில் எய்ட்ஸ் நோயால் பாதிக்கப்பட்ட நபா்களுக்கு வாழ்நாள் முழுவதும் இலவசமாக (ஏ.ஆா்.டி) கூட்டு மருத்துவ சிகிச்சை அளிப்பதற்கு முதன்முறையாக தனியாா் பங்கீட்டு முறையின்கீழ், காட்டாங்கொளத்தூா் எஸ்.ஆா்.எம். மருத்துவமனை, கன்யாகுமரி ஸ்ரீமூகாம்பிகை மருத்துவக் கல்லூரி மருத்துவமனை, சென்னை ஸ்ரீ பாலாஜி மருத்துவமனை மருத்துவக் கல்லூரி உள்ளிட்ட 8 மருத்துவக் கல்லூரி மருத்துவமனைகள் தோ்ந்தெடுக்கப்பட்டன. அதில் சின்னகொளம்பாக்கம் கற்பக விநாயகா மருத்துவக் கல்லூரி மற்றும் ஆராய்ச்சி மையம் தோ்வு செய்யப்பட்டு, அதன் தொடக்க நிகழ்ச்சி மருத்துவமனை வளாகத்தில் நடைபெற்றது.
தமிழ்நாடு மாநில எய்ட்ஸ் கட்டுப்பாட்டு சங்க திட்ட இயக்குநா் ஹரிஹரன் தலைமை வகித்தாா். செங்கல்பட்டு மாவட்ட ஆட்சியா் ராகுல்நாத், கற்பக விநாயகா மருத்துவமனை நிா்வாக இயக்குநா் மருத்துவா் ஆா்.அண்ணாமலை ரகுபதி ஆகியோா் முன்னிலை வகித்தனா். மருத்துவம் மற்றும் மக்கள் நல்வாழ்வுத் துறை அமைச்சா் மா.சுப்பிரமணியன் மையத்தை தொடக்கி வைத்துப் பேசியது:
இந்த கூட்டு மருத்துவ சிகிச்சை மையத்தில் புதிய எய்ட்ஸ் நோயாளிகளைக் கண்டறிதல், முழு பரிசோதனை ஆகியவை செய்யப்பட்டு, தொடா் சிகிச்சை இங்குள்ள மையத்தில் நடைபெறும். தமிழகத்தில் அரசு மருத்துவக் கல்லூரி மருத்துவமனைகளில் எய்ட்ஸ் நோயாளிகளுக்கான கூட்டு மருத்துவ சிகிச்சை மையங்கள் இயங்கி வருகின்றன. தமிழக மக்களின் அவசியம் கருதி, 8 தனியாா் மருத்துவக் கல்லூரி மருத்துவமனைகளில் தொடங்க தமிழக அரசு ஒப்பந்தம் செய்து, அதற்கான முதல் மையம் தற்போது தொடங்கப்பட்டுள்ளது.
கருமுட்டை விற்பனையைத் தடுக்கும் பொருட்டு, தொடா்ந்து தமிழக சுகாதாரத் துறை, காவல்துறை ஆகியவை இணைந்து தீவிரமாகக் கண்காணித்து நடவடிக்கை எடுத்து வருகிறது என்றாா் அவா்.
மருத்துவம், மக்கள் நல்வாழ்வுத் துறை முதன்மைச் செயலா் ஜெ.ராதாகிருஷ்ணன், எம்எல்ஏ க.சுந்தா், திருக்கழுகுன்றம் ஊராட்சி ஒன்றியக் குழு தலைவா் மருத்துவா் ஆா்.டி.அரசு உள்ளிட்டோா் பங்கேற்றனா்.