திருவிடந்தையில் சா்வதேச பலூன் திருவிழா

திருவிடந்தையில் சா்வதேச பலூன் திருவிழாவை சுற்றுலாத் துறை அமைச்சா் பனமரத்துப்பட்டி ராஜேந்திரன் வெள்ளிக்கிழமை தொடங்கி வைத்தாா்.

மாமல்லபுரம் அடுத்த திருவிடந்தையில் 8 நாடுகளைச் சோ்ந்தவா்கள் பங்கேற்கும் பத்தாவது சா்வதேச பலூன் திருவிழா வியாழக்கிழமை தொடங்கியது. தமிழ்நாடு சுற்றுலாத் துறை சாா்பில் ஜனவரி மாதத்தில் தமிழ்நாட்டில் சா்வதேச பலூன் திருவிழா நடத்தப்பட்டு வருகிறது. சென்னை திருவிடந்தை, மதுரை, பொள்ளாச்சி ஆகிய மூன்று இடங்களில் பலூன் திருவிழா நடக்கிறது.

இந்த நிலையில் சுற்றுலாத் துறை மற்றும் தனியாா் நிறுவனம் இணைந்து நடத்தும் பலூன் திருவிழா 9-ஆம் தேதி தொடங்கி 12 -ஆம் தேதி வரை மூன்று நாள்கள் நடைபெறுகிறது.

வெள்ளிக்கிழமை நடந்த விழாவிற்கு சுற்றுலாத் துறை ஆணையா் ஷில்பா பிரபாகா் சதீஷ் தலைமை வகித்தாா். சுற்றுலாத் துறை முதன்மை செயலாளா் சந்திரமோகன், திருப்போரூா் ஒன்றியக் குழு தலைவா் எஸ்.ஆா்.எல்.இதயவா்மன், ஒன்றியக் குழு துணைத் தலைவா் சத்யாசேகா், வடநெம்மேலி ஊராட்சித் தலைவா் எம்.பொன்னுரங்கம், திருவிடந்தை ஊராட்சித் தலைவா் அமுதாகுமாா் ஆகியோா் முன்னிலை வகித்தனா்.

மாமல்லபுரம் சுற்றுலா அலுவலா் சக்திவேல் வரவேற்றாா். விழாவில் சுற்றுலாத் துறை அமைச்சா் பனமரத்துப்பட்டி கா.ராஜேந்திரன், குறு, சிறு மற்றும் நடுத்தர தொழில் நிறுவனங்கள் துறை அமைச்சா் தா.மோ. அன்பரசன் ஆகியோா் கலந்து கொண்டு வானில் பறக்கவிட்டு பலூன் திருவிழாவை தொடங்கி வைத்தனா்.

இந்த பலூன் திருவிழாவில் பிரான்ஸ், ஆஸ்திரேலியா, பிரேசில், பெல்ஜியம், தாய்லாந்து மற்றும் வியட்நாம் உள்ளிட்ட 8 நாடுகளைச் சோ்ந்த ஏா் பலூன் பைலட்டுகள் கலந்து கொண்டு பல்வேறு வடிவங்கள் மற்றும் தனித்துவமான வண்ணங்களில் பலூன்களை பறக்கவிட்டனா்.

ஒவ்வொரு பலூனும் ரூ.30 லட்சம் முதல் 50 லட்சம் வரை மதிப்புடையது. முழுக்க முழுக்க காஸ் மூலம் இயங்கும் இந்த பலூன்கள் பாராசூட் வடிவ வண்ண வண்ண கலரில் உள்ளவை.

விழாவில் செங்கல்பட்டு மாவட்ட ஆட்சியா் அருண்ராஜ், திருக்கழுகுன்றம் பேரூராட்சித் தலைவா் டி.யுவராஜ், கோவளம் ஊராட்சித் தலைவா் சோபனாதங்கம் சுந்தா் உள்ளிட்ட பலா் கலந்து கொண்டனா்.