Enable Javscript for better performance
\\\"ஆசியாவின் முதல் அச்சு நூல் தமிழ் நூல் என்பதை உரைத்தவர் தனிநாயக அடிகள்\\\'- Dinamani

சுடச்சுட

    "ஆசியாவின் முதல் அச்சு நூல் தமிழ் நூல் என்பதை உரைத்தவர் தனிநாயக அடிகள்'

    By dn  |   Published on : 17th February 2013 05:57 AM  |   அ+அ அ-   |    |  

    16ch

    ஆசியாவின் முதல் அச்சு நூல் தமிழ் நூல் என்று உலகுக்கு உரைத்தவர் தனிநாயக அடிகள் என்று தமிழ்ப் பல்கலைக்கழகத்தின் முன்னாள் துணைவேந்தர் இ. சுந்தரமூர்த்தி கூறினார்.

    சென்னையில் சனிக்கிழமை நடைபெற்ற தனிநாயக அடிகளாரின் நூற்றாண்டு தொடக்க விழாவில் தலைமையுரையாற்றிய சுந்தரமூர்த்தி பேசியது: சொல்லின் செல்வர் ரா.பி. சேதுபிள்ளை "தமிழ் உலகின் சின்னம் தனிநாயக அடிகள்' என்று போற்றியுள்ளார். அவரை மு.வ., அண்ணா போன்றோர் பாராட்டியுள்ளனர். ஆசியாவிலேயே முதல் அச்சு நூல் தமிழ் நூல்தான் என்பதை உரைத்தவர் தனிநாயகம் ஆவார்.

    அமெரிக்காவிலும் ஐரோப்பாவிலும் தமிழின் பெருமைகளை பேசியிருக்கிறார். 100 ஆண்டு பழமையான பொருள்களை எல்லாம் பெரிதும் போற்றும் அமெரிக்காவில் 5,000 ஆண்டுகள் பழமையான தமிழ்ப் பண்பாட்டை சொல்லும்போது அமெரிக்கர்கள் வியந்ததை எண்ணி மகிழ்கிறேன் என்று அவர் சொல்லியிருக்கிறார். மேலும் அவர் தொல்காப்பியமே சிறந்த இலக்கியம் என்பதைப் பதிவு செய்திருக்கிறார்.

    முன்னதாக வரவேற்புரையாற்றிய விழாக் குழு பொதுச் செயலாளர் அருள்தந்தை அமுதன் அடிகள், "பல்வேறு நாடுகளுக்கு சென்று தமிழின் சிறப்புகளை பரப்பியவர் தனிநாயக அடிகள். வீரமாமுனிவர், கால்டுவெல் பிரபு, ஜி.யு. போப் போன்றவர்கள் வெளிநாட்டில் இருந்து தமிழ்ப் பணியாற்றினார்கள். ஈழத்தில் இருந்து வந்து தமிழ்ப் பணியாற்றியவர் தனிநாயக அடிகளார்.

    அவர் பத்துக்கும் மேற்பட்ட மொழிகளை அறிந்தவர். தாம் அறிந்த அனைத்து மொழிகளையும் தமிழ் மொழியின் வளர்ச்சிக்கு பயன்படுத்திய பெருமை அவருக்கு உண்டு. தமிழை பக்தி மொழி என்றுரைத்தவர் அவர் என்றார்.

    தஞ்சை தமிழ்ப் பல்கலைக்கழக முன்னாள் துணைவேந்தர் அவ்வை நடராசன்: "தமிழ் இலக்கியத்தில் இயற்கை' என்ற ஆய்வு நூலை தனிநாயக அடிகளார் எழுதியுள்ளார். இதில் மலர், செடி, மலை, மரம் உள்ளிட்ட இயற்கை தொடர்பான தகவல்கள் சங்க இலக்கியத்தில் நிறைந்துள்ளதை விளக்கியிருக்கிறார்.

    இதில் பல மொழிகளையும் பல மொழி அறிஞர்களையும் தொட்டுள்ளார். மற்ற மொழி இலக்கியங்கள் சங்க இலக்கியத்துக்கு ஈடு இணையே கிடையாது. இத்தாலிய மொழி பேசினாலே கவிதை என்று சொல்வார்கள், ஆனால், தமிழ் படித்தால் இத்தாலிய மொழியைவிட  இனிமையானது என்பது தெரியும். தமிழ் விழுமியங்களின் எச்சங்கள் உலகெங்கும் இருப்பதை தனிநாயக அடிகளால்தான் காண முடிந்தது.

    லத்தீன் சட்டமொழி என்றும், ஜெர்மானிய மொழியை அறிவியல் மொழி என்றும், ஆங்கிலத்தை வணிக மொழி என்றும் கூறுகிறார்கள். தமிழ் பக்தி மொழி என்று பெருமிதம் கொள்கிறார் தனிநாயக அடிகள் என்றார்.

    "அடிகளாரின் ஒப்பிலக்கியப் பார்வை' என்ற தலைப்பில் முனைவர் கா. செல்லப்பன்: மூலைமுடுக்குகளில் இருந்த ஓலைச் சுவடிகளை தமிழகத்தில் வெளிச்சத்துக்கு கொண்டு வந்தவர் உ.வே.சா.. தமிழை உலகத்தின் வெளிச்சத்துக்கு கொண்டு வந்தவர் தனிநாயக அடிகள்.

    உலக மொழிகள் எல்லாம் உணர்ந்து அவற்றோடு தமிழ் இலக்கியத்தை உள்ளபடியே ஒப்பிட்டு ஆராய்ந்தவர் தனிநாயக அடிகள்.

    இலக்கியங்கள் ஆவணங்கள் இல்லை, அவை நினைவுச் சின்னங்கள் என்றார் அவர்.

    தமிழ் இலக்கியத்தில் உள்ள இயற்கையையும் உலக இலக்கியத்தில் உள்ள இயற்கையையும் அவர் ஒப்பிடுகிறார். திருக்குறளை அர்த்தசாஸ்திரங்களுடனும் பிளாட்டோ, அரிஸ்டாட்டிலுடனும் ஒப்பிடுகிறார். திருக்குறள் மதச்சார்பற்ற இலக்கியம். மதம், மொழி, இனம் கிடையாது என்பதை நிறுவிக் காட்டியவர் தனிநாயகம் என்றார் செல்லப்பன்.

    பின்னர் நடந்த சொல்லரங்கத்தில் கவிக்கோ அப்துல் ரகுமான் பேசியது: தன்னைத்தானே தமிழ்த் தூதுவராக மாற்றிக்கொண்டவர் தனிநாயக அடிகள் ஆவார். அவர் கிரேக்கம், ரோமானியம் மற்றும் பெüத்த இலக்கியங்களில் உள்ள கருத்துகளோடு திருக்குறளின் கருத்துகளை ஒப்பிட்டு ஆய்வு செய்தவர்.

    கிரேக்கம், லத்தீன் ஆகிய மொழிகள் செவ்வியல் மொழி தகுதி பெற்றுள்ளன. ஆனால் தமிழுக்கு அந்த தகுதி தரப்படவில்லை. உயர்ந்த இலக்கியமும் பண்பாட்டுக் கூறுகளும் உள்ள மொழியே செவ்வியல் மொழி என்பது விதி. அதன்படி பார்த்தால் கிரேக்கமும் லத்தீனும் தமிழுக்கு அருகிலேயே வரமுடியாது. பிற மொழிகளுடன் ஒப்பிட்டால் தமிழ் செவ்வியல் மொழி என்பது தெரியவரும். இதனை உலகுக்குச் சொன்னவர் தனிநாயக அடிகள். எனவே, தமிழை செவ்வியல் மொழியாக உலகம் ஏற்கும் வரை ஓயக்கூடாது என்றார் கவிக்கோ அப்துல் ரகுமான்.

    "அடிகளாரின் ஆய்விதழ்ப் பணிகள்' என்ற தலைப்பில் முனைவர் உலகநாயகி பழனி: தனிநாயக அடிகள் 52 ஆண்டுகள் இதழியல் பணியில் இருந்தவர். இதழியல் மூலம் தமிழை உலகம் முழுவதும் பரப்பியவர். அவர் 15 வயதிலேயே ஆங்கிலப் பத்திரிகைக்கு ஆய்வுக் கட்டுரைகள் எழுதியவர். "தமிழ் கல்ச்சர்' என்ற ஆங்கில இதழ் மூலம் தமிழ்ப் பண்பாடு குறித்து ஆய்வுக் கட்டுரைகள் வெளியிட்டார். "ஜர்னல் ஆஃப் தமிழ் ஸ்டடீஸ்' என்ற இதழ் மூலம் தமிழின் சிறப்புகளைப் பதிவு செய்தார் என்றார் உலகநாயகி.

    விழாவில் முனைவர் ச.சு. ராமர் இளங்கோ எழுதிய "தமிழ்ப் பேரறிஞர் தனிநாயக அடிகளார்' என்ற நூலை எஸ்.ஆர்.எம். பல்கலைக்கழகத்தின் துணைவேந்தர் பொன்னவைக்கோ வெளியிட்டார். பிரான்ஸ் நாட்டில் இருந்த வந்த தமிழறிஞர் ரவீந்திரநாதன், முனைவர் சி.அ. ராசராசன் ஆகியோர் பெற்றுக் கொண்டனர். தனிநாயக அடிகளாரின் படத்தை லயோலா கல்லூரி தலைவர் அருள்தந்தை கு. அமல் திறந்து வைத்தார்.

    துணைச் செயலாளர் முனைவர் மு. முத்துவேல் நன்றி கூறினார்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp