வழக்குரைஞர்கள் 3 பேர் இடைநீக்கம்:  பார்கவுன்சில் நடவடிக்கை

சாலை விபத்து தொடர்பான ஒரே வழக்குக்காக, வெவ்வேறு நீதிமன்றங்களில் இழப்பீடு கேட்டு  முறைகேட்டில் ஈடுபட முயன்ற 3 வழக்குரைஞர்களை 5 ஆண்டுகளுக்கு இடை நீக்கம் செய்து பார்கவுன்சில் நடவடிக்கை எடுத்துள்ளது.

சாலை விபத்து தொடர்பான ஒரே வழக்குக்காக, 3 நீதிமன்றங்களில் விபத்து இழப்பீடு கோரி வழக்கு தொடரப்பட்டது.

இந்த வழக்கை விசாரித்த உயர்நீதிமன்றம், விசாரணையை சிபிசிஐடி விசாரணைக்கு மாற்றி உத்தரவிட்டது. மேலும், விபத்து இழப்பீடு கோரி தொடரப்படும் வழக்குகளின் உண்மைத் தன்மை குறித்து ஆய்வு செய்ய, ஓய்வுபெற்ற உயர்நீதிமன்ற நீதிபதி கே.சந்துரு தலைமையில் தனிக்குழுவை அமைத்தது.  இதுதொடர்பாக உயர்நீதிமன்றம் பிறப்பித்த உத்தரவை, உயர்நீதிமன்ற பதிவாளர் தமிழ்நாடு புதுச்சேரி பார் கவுன்சிலுக்கு அனுப்பினார்.
அதன் அடிப்படையில், தமிழ்நாடு புதுச்சேரி பார் கவுன்சில் ஒழுங்கு நடவடிக்கைக் குழு, மூத்த வழக்குரைஞர் சிங்காரவேலன் தலைமையில் விசாரணை மேற்கொண்டது. இந்நிலையில் குழு பிறப்பித்துள்ள உத்தரவில், இந்தச் சம்பவத்தில் தொடர்புடைய வழக்குரைஞர்களை பார்கவுன்சிலில் இருந்தே  நிரந்தரமாக நீக்குவதற்கு வாய்ப்பு உள்ளது. இருப்பினும்  3 வழக்குரைஞர் களும் விபத்தில் பலியானவரின் குடும்பத்தினருக்கு தலா ரூ.3 லட்சம் வழங்குவதாக உத்தரவாதம் அளித்துள்ளனர். அதைக் கருத்தில் கொண்டு, 3 வழக்குரைஞர்களையும்,  பார்கவுன்சிலில் இருந்து  5 ஆண்டுகளுக்கு மட்டும் இடைநீக்கம் செய்து உத்தரவு பிறப்பிக்கப்பட்டுள்ளதாக  தெரிவிக்கப்பட்டுள்ளது.