சென்னை: சென்னை மக்களின் குடிநீர் தேவைக்காக வீராணம் ஏரிக்கு கீழணையில் இருந்து 500 கனஅடி தண்ணீர் திறந்து விடப்பட்டுள்ளது.
இதையடுத்து சனிக்கிழமை காலை முதல் ஏரிக்கு 190 கன அடி தண்ணீர் வந்து கொண்டிருக்கிறது. கடலூர் மாவட்டம், காட்டுமன்னார் கோவிலை அடுத்த லால்பேட்டையில் வீராணம் ஏரி உள்ளது. டெல்டா பகுதி விவசாயிகளுக்கு மிகப் பெரிய நீர் ஆதாரமாக இந்த ஏரி விளங்கி வருகிறது. மேலும், சென்னை மக்களின் குடிநீர் தேவையைப் பூர்த்தி செய்வதிலும் இந்த ஏரி முக்கிய பங்கு வகிக்கிறது.
இந்த ஏரியின் மொத்த நீர்மட்டம் 47.50 அடியாகும். தற்போது ஏரியில் 45.45 அடி தண்ணீர் உள்ளது. சென்னை நகரின் குடிநீர்த் தேவைக்காக விநாடிக்கு 41 கனஅடி நீர் அனுப்பி வைக்கப்படுகிறது. கோடை வெயிலின் தாக்கம் தொடர்ந்து அதிகமாக இருப்பதால் நீர்மட்டம் வேகமாகக் குறைந்து வருகிறது.
இதற்கிடையே சென்னையில் கடுமையான குடிநீர்த் தட்டுப்பாடு ஏற்பட்டுள்ளது. நிலைமையைச் சமாளிக்க சென்னை குடிநீர் வடிகால் வாரியம், வீராணம் ஏரியில் போதிய அளவில் தண்ணீரை சேமித்து வருகிறது. வீராணம் ஏரியில் 39 அடிக்கு மேல் தண்ணீர் இருந்தால் மட்டுமே சென்னைக்கு தண்ணீர் கொண்டு செல்ல முடியும். இதன் காரணமாக நீர்மட்டம் அதற்கு கீழே குறையாமல் அதிகாரிகள் கண்காணித்து வருகிறார்கள்.
நீர்மட்டம் தற்போது வேகமாக குறைந்து வருவதால், கொள்ளிடம் ஆற்றின் குறுக்கே அணைக்கரையில் உள்ள கீழணையில் இருந்து வீராணம் ஏரிக்கு கடந்த வியாழக்கிழமை இரவு வினாடிக்கு 500 கனஅடி தண்ணீர் திறந்து விடப்பட்டது. இந்தநிலையில் சனிக்கிழமை காலை நிலவரப்படி ஏரிக்கு 190 கன அடி தண்ணீர் வந்து கொண்டிருக்கிறது. இதனால் ஏரியின் நீர்மட்டம் படிப்படியாக உயர தொடங்கி இருக்கிறது. தொடர்ந்து ஏரி நிரம்பும் வரையில் தண்ணீர் வரத்து இருக்கும் என்று பொதுப்பணித் துறை அதிகாரிகள் தெரிவித்தனர்.