இளைஞா் வெட்டிக் கொலை: ஒருவா் கைது

சென்னை பள்ளிக்கரணையில் டாஸ்மாக் மதுபானக் கடையில் இருவா் வெட்டிக் கொலை செய்யப்பட்ட வழக்கில், இளைஞா் கைது செய்யப்பட்டாா்.

பள்ளிக்கரணை அருகே பெரும்பாக்கம் முதலாவது பிரதான சாலைப் பகுதியைச் சோ்ந்தவா் ஆ.ஸ்டீபன் (28). இவா், லாரி கிளீனராக வேலை செய்து வந்தாா். ஸ்டீபனின் உறவினா் பெரும்பாக்கம், இந்திராநகரைச் சோ்ந்தவா் தே.ஆனந்த் (29). இவா்கள் இருவரும் பெரும்பாக்கம் ஆனந்தா நகா் பிரதான சாலையில் உள்ள டாஸ்மாக் கடையில் உள்ள மதுபானக் கூடத்தில் கடந்த அக்டோபா் 14-ஆம் தேதி மது அருந்திக் கொண்டிருந்தனா்.

அப்போது அங்கு மோட்டாா் சைக்கிள்களில் வந்த சில நபா்கள், இருவரிடமும் தகராறு செய்தனா். தகராறு முற்றவே ஸ்டீபனையும், ஆனந்தையும் வெட்டிக் கொலை செய்துவிட்டு, அந்த நபா்கள் தப்பியோடினா்.

இது குறித்து பள்ளிக்கரணை போலீஸாா் வழக்குப் பதிவு செய்து, விசாரணை செய்து வந்தனா். விசாரணையில் திருவல்லிக்கேணி பொன்னப்பன் தெருவைச் சோ்ந்த வெ.ரமேஷ் (36) மற்றும் அவரது கூட்டாளிகள் சோ்ந்து கொலை செய்திருப்பது தெரியவந்தது. இதையடுத்து போலீஸாா் ரமேஷை செவ்வாய்க்கிழமை கைது செய்தனா்.