Enable Javscript for better performance
பாலியல் குற்றங்களால் பாதிக்கப்பட்ட பெண்களுக்கு உதவ ‘தோழி’ புதிய திட்டம்- Dinamani

சுடச்சுட

    

    பாலியல் குற்றங்களால் பாதிக்கப்பட்ட பெண்களுக்கு உதவ ‘தோழி’ புதிய திட்டம்

    By DIN  |   Published on : 09th November 2019 02:01 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    plan

    பாலியல் குற்றங்களால் பாதிக்கப்பட்டவா்களுக்கு உதவுவதற்காக ‘தோழி’ என்ற புதிய திட்டத்தை சென்னை காவல் துறை அறிமுகப்படுத்தி உள்ளது. இந்த திட்டத்தை தொடக்கி வைத்த சென்னை பெருநகர காவல் ஆணையா் ஏ.கே.விசுவநாதன், பாதிக்கப்பட்ட பெண்களை காவலா்கள் கனிவுடன் அணுக வேண்டும் என அறிவுறுத்தினாா்.

    பாலியல் வன்கொடுமைக் குற்றங்களில் பாதிக்கப்பட்டவா்களுக்கு மனரீதியாகவும், உளவியல் ரீதியாகவும், சட்ட ரீதியாகவும் உதவிகளையும், ஆலோசனைகளையும் வழங்கும் வகையில் சென்னையில் உள்ள 35 அனைத்து மகளிா் காவல் நிலையங்களில் தலா இரு காவலா்களுக்கு பல்வேறு பயிற்சிகள் ‘தோழி’ திட்டத்தின் மூலம் வழங்கப்பட உள்ளது. இந்த திட்டத்தை பெருநகர காவல் ஆணையா் ஏ.கே.விசுவநாதன் வெள்ளிக்கிழமை தொடக்கி வைத்து பேசியது:

    நாட்டிலேயே பெண்கள், குழந்தைகளுக்கு பாதுகாப்புமிக்க நகரங்களில் சென்னை முதலிடத்தில் உள்ளது. அதற்கு காவலா்களின் அயராத பணிதான் முக்கிய காரணமாகும். பாலியல் குற்றத்தால் பாதிக்கப்பட்ட குழந்தைகள், பெண்கள் ஆகியோருக்கு என்ன மாதிரியான உதவிகள் தேவைப்படும், அவா்களுக்கு காவல்துறையின் சாா்பில் என்ன உதவிகள் செய்ய முடியும் என்பதை ஆலோசித்து ‘தோழி’ என்ற இந்த திட்டம் உருவாக்கப்பட்டுள்ளது.

    ஆலோசனை வழங்குவாா்கள்: இத் திட்டம், குழந்தைகளுக்கு எதிரான பாலியல் வன்கொடுமை தடுப்புச் சட்டத்தின் விதிமுறைகளின்படியும், அச் சட்டத்தின் வழிக்காட்டுதலின்படியும் வடிவமைக்கப்பட்டுள்ளது. இத் திட்டத்தின்படி, பாலியல் குற்றத்தால் பாதிக்கப்பட்டவரை காவலா்கள் நேரில் சந்தித்து ஆலோசனைகளையும், வழிக்காட்டுதல்களையும் வழங்குவாா்கள். மேலும் அவா்களுக்கு தேவைப்படும் மன ரீதியான, சமூக ரீதியான, சட்ட ரீதியான உதவிகளையும் அறிந்து, இந்த காவலா்கள் உதவி செய்வாா்கள். தோழி திட்டத்தின் மூலம் பயிற்சி அளிக்கப்படும் காவலா்கள், பாலியல் குற்றத்தால் பாதிக்கப்பட்டவரிடம், அவரது குடும்பத்தினரிடமும் மனம் திறந்து பேசி, அவா்களது எண்ணங்களையும், மன அழுத்தங்களையும் வெளியே கொண்டு வர வேண்டும். இதற்காக அவா்கள், சீருடையின்றி சாதாரண உடையில் பொதுமக்களிடம் பழகுவாா்கள்.

    கனிவுடன் அணுகுங்கள்: ‘தோழி’ திட்டத்தில் பயிற்சி பெறும் காவலா்கள், தொடா்ந்து புதிய நுணுக்கங்கள் மூலமாகவும், புதிய தகவல்கள் மூலமாகவும் தங்களை புதுப்பித்துக் கொள்ள வேண்டும். பாலியல் குற்றங்களால் பாதிக்கப்பட்டவா்களிடம் மிகுந்த பொறுமையுடனும், கனிவுடனும் அணுக வேண்டும். அப்போது நாம் எதிா்பாா்த்த வெற்றியை பெற முடியும் என்றாா் அவா்.

    நிகழ்ச்சியில் ஆணையா் விசுவநாதன், தோழி திட்டத்தில் பயிற்சி பெறும் 70 பெண் காவலா்களுக்கு நிா்பயா முத்திரையையும், இளஞ்சிவப்பு வண்ண சீருடையும் வழங்கினாா்.

    முன்னதாக இந்த நிகழ்ச்சிக்கு பெருநகர கூடுதல் ஆணையா் (வடக்கு) ஆா்.தினகரன், மேற்கு மண்டல இணை ஆணையா் விஜயகுமாரி ஆகியோா் முன்னிலை வகித்தனா்.

    நிகழ்ச்சியில் நுண்ணறிவுப் பிரிவு துணை ஆணையா் ஆா்.திருநாவுக்கரசு, மனநல மருத்துவா் ஷாலினி, பேராசிரியா் ஆண்ட்ரூ சேசுராஜ் உள்ளிட்ட பலா் பங்கேற்றனா். இறுதியில் பெண்கள் மற்றும் குழந்தைகளுக்கு எதிரான குற்றத் தடுப்புப் பிரிவு துணை ஆணையா் எச்.ஜெயலட்சுமி நன்றி கூறினாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai