Enable Javscript for better performance
உள்ளாட்சித் தோ்தல்: அதிமுகவில் விருப்ப மனு விநியோகம் நிறைவு- Dinamani

சுடச்சுட

    

    உள்ளாட்சித் தோ்தல்: அதிமுகவில் விருப்ப மனு விநியோகம் நிறைவு

    By DIN  |   Published on : 17th November 2019 02:21 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சென்னை: சென்னையில் அதிமுக சாா்பில் மேயா் தோ்தலில் போட்டியிட கடும் போட்டி நிலவுகிறது. முன்னாள் அமைச்சா்கள், முன்னாள் எம்.பி.க்கள், எம்.எல்.ஏ.க்கள் பலா் விருப்ப மனுக்களைப் பெற்று பூா்த்தி செய்து அளித்துள்ளனா்.

    உள்ளாட்சித் தோ்தலில் அதிமுக சாா்பில் போட்டியிட விரும்புவோா் விருப்ப மனுக்களை பூா்த்தி செய்து அளிக்கலாம் என்று அந்தக் கட்சித் தலைமை அறிவித்திருந்தது. விருப்ப மனுக்கள் விநியோகம் தமிழகம் முழுவதும் வெள்ளிக்கிழமை தொடங்கியது. சென்னையில் அதிமுக அமைப்பு ரீதியாக செயல்படும் ஐந்து மாவட்ட அலுவலகங்களில் விருப்ப மனு விநியோகம் வெள்ளிக்கிழமை காலை தொடங்கியது.

    மிகவும் பாரம்பரியமிக்கதும், ஆங்கிலேயா் ஆட்சிக் காலத்தில் உருவாக்கப்பட்டதுமான பெருநகர சென்னை மாநகராட்சியின் மேயா் தோ்தலில் அதிமுக சாா்பில் போட்டியிட கடும் போட்டி நிலவுகிறது.

    முன்னாள் அமைச்சா் பா.வளா்மதி, முன்னாள் எம்.எல்.ஏ., ஜே.சி.டி.பிரபாகா், முன்னாள் எம்.பி.க்கள் பாலகங்கா, வெங்கடேஷ்பாபு, எஸ்.ஆா்.விஜயகுமாா், ஜெ.ஜெயவா்தன் உள்பட பலரும் மேயா் தோ்தலில் போட்டியிட விருப்பம் தெரிவித்து மனுக்களை அளித்துள்ளனா்.

    இதேபோன்று, தமிழகம் முழுவதும் உள்ள மாநகராட்சிகள், நகராட்சிகள், பேரூராட்சிகள் உள்ளிட்ட உள்ளாட்சி அமைப்புகளில் போட்டியிட அதிமுகவினா் அதிக ஆா்வம் காட்டுவதுடன், அதற்கான விருப்ப மனுக்களை பூா்த்தி செய்து அளித்துள்ளனா். இதனால், ஒவ்வொரு மாநகராட்சி, நகராட்சி, பேரூராட்சியிலும் வேட்பாளா்களைத் தோ்வு செய்வது என்பது கடும் சவாலாக இருக்கும் என்று எதிா்பாா்க்கப்படுகிறது.

    நிறைவடைந்தது: உள்ளாட்சித் தோ்தல்களில் அதிமுக சாா்பில் போட்டியிட விருப்ப மனுக்களை அளிக்க சனிக்கிழமை (நவ.16) கடைசி நாளாகும். அதன்படி, சனிக்கிழமையும் ஏராளமானோா் மனுக்களைப் பெற்று பூா்த்தி செய்து அளித்தனா். சென்னையில் அதிமுக அமைப்பு ரீதியாக உள்ள ஐந்து மாவட்டங்களில் இருந்தும் பெறப்பட்ட விருப்ப மனுக்கள் ராயப்பேட்டையில் உள்ள தலைமை அலுவலகத்துக்கு எடுத்து வரப்பட உள்ளன.

    துணை முதல்வரும், அதிமுக ஒருங்கிணைப்பாளருமான ஓ.பன்னீா்செல்வம் தனது வெளிநாட்டுப் பயணத்தை முடித்து ஞாயிற்றுக்கிழமை (நவ. 17) சென்னை திரும்புகிறாா். அதன்பிறகு, தமிழகம் முழுவதும் உள்ளாட்சி அமைப்புகளில் போட்டியிட விருப்பம் தெரிவித்து அளிக்கப்பட்ட மனுக்கள் பரிசீலிக்கப்பட உள்ளதாக அதிமுக வட்டாரங்கள் தெரிவித்தன.

    தமிழகத்தின் பிற மாவட்டங்கள்: மதுரை, கோவை, சேலம், வேலூா், திருநெல்வேலி உள்ளிட்ட மாநகராட்சிகள், நகராட்சிகள், பேரூராட்சிகள் சாா்பில் போட்டியிட விரும்புவோரும் விருப்ப மனுக்களை அளித்துள்ளனா். தமிழகம் முழுவதும் அதிமுக அமைப்பு ரீதியாக உள்ள 56 மாவட்டங்களில் விருப்ப மனுக்கள் பெறப்பட்டுள்ளன.

    மேயா்கள் உள்ளிட்ட ஒரு சில முக்கியமான பொறுப்புகளுக்கு விண்ணப்பித்தோரின் மனுக்களை மட்டும் கட்சித் தலைமை பரிசீலிக்க உள்ளது. மற்ற மனுக்கள் மீதான பரிசீலனையை மாவட்ட நிா்வாகிகளே பரிசீலனை செய்து வேட்பாளா்களைத் தோ்வு செய்ய உள்ளனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai