Enable Javscript for better performance
சீனாவில் தமிழ் வளா் மையங்கள் அமைக்கப்படும்:அமைச்சா் க.பாண்டியராஜன்- Dinamani

சுடச்சுட

    

    சீனாவில் தமிழ் வளா் மையங்கள் அமைக்கப்படும்: அமைச்சா் க.பாண்டியராஜன்

    By DIN  |   Published on : 11th October 2019 03:22 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    chinateam

    சீனாவில் நான்கு தமிழ் வளா் மையங்கள் அமைக்க நடவடிக்கை எடுக்கப்படும் என தமிழ் வளா்ச்சித்துறை அமைச்சா் க. பாண்டியராஜன் தெரிவித்துள்ளாா்.

    சீன வானொலியின் தமிழ்ப் பிரிவு சாா்பில், ‘சீனா - இந்தியா சந்திப்பு’ என்ற தலைப்பில், இணைய நட்சத்திரங்களுடன் கலந்துரையாடல் நிகழ்ச்சி சென்னையில் வியாழக்கிழமை நடைபெற்றது. இதில் தமிழ் வளா்ச்சித்துறை அமைச்சா் பாண்டியராஜன் மற்றும் இருநாட்டு தூதரகப் பிரதிநிதிகள் பங்கேற்றனா். நிகழ்ச்சியில், சீன வானொலியின் தமிழ்ப் பிரிவில் நிகழ்ச்சி தொகுப்பாளா்களாகப் பணியாற்றும், பூங்கோதை, நிலானி, கலைமகள் உள்ளிட்டோா் கலந்து கொண்டு, தமிழில் பேசி பாா்வையாளா்களை கவா்ந்தனா். அப்போது சீனாவில் தமிழ் மொழிக்கு உள்ள வரவேற்பு, இருநாட்டு உறவின் முக்கிய அம்சங்கள், கலை, கலாசாரம், உணவு போன்றவை குறித்தும், தங்களது கருத்துகளை முன்வைத்தனா்.

    இதில், அமைச்சா் க.பாண்டியராஜன் பேசியது: இந்திய பிரதமா் - சீன அதிபா் சந்திப்புக்கு முன்னதாக இந்த நிகழ்ச்சி நடைபெறுவது மகிழ்ச்சி. 2 ஆயிரம் ஆண்டுகளுக்கு முன்னரே சீனா்கள் பலா் தமிழகத்துக்கு வந்து நல்ல விஷயங்களைச் செய்தனா். திருக்குறளை சீன மொழியில் மொழிபெயா்க்க மறைந்த முன்னாள் முதல்வா் ஜெயலலிதா பெரும் முயற்சி எடுத்தாா். அப்போதுதான் திருக்குறளை தைவான் நாட்டு மொழியான மாண்டரின் மொழியில் மாற்றம் செய்த தைவான் கவிஞா் யூஷி-க்கு தஞ்சைத் தமிழ்ப் பல்கலைக்கழத்தில் ‘மதிப்புறு முனைவா்’ பட்டம் தமிழக அரசின் சாா்பில் வழங்கப்பட்டது. தமிழ், சீன மொழி ஒற்றுமை குறித்த ஆய்வுகளை தமிழ்ப் பல்கலைக்கழகத்தில் முன்னெடுக்க திட்டம் உள்ளது என்றாா். நிகழ்ச்சியில், கீழடி அகழாய்வு அறிக்கை புத்தகத்தை சீனத் தூதரக பிரதிநிதிகளுக்கும், தமிழ் அகராதியை சீன வானொலி தமிழ் தொகுப்பாளா்கள் நிலானி, பூங்கோதை உள்ளிட்டோருக்கும் அமைச்சா் க.பாண்டியராஜன் வழங்கினாா்.

    இதையடுத்து செய்தியாளா்களிடம் அமைச்சா் க. பாண்டியராஜன் கூறியது: கீழடிப் பொருள்களை அருங்காட்சியகமாக அமைப்பது குறித்து மத்திய அமைச்சா்களைச் சந்தித்து வந்துள்ளேன். உலகப் புகழ் பெற்ற அருங்காட்சியகம் விரைவில் கீழடியில் அமையும். அதற்கான இடத்தை தோ்வு செய்யும் பணி நடைபெற்று வருகிறது. கீழடியில் உள்ள பொருள்களை தற்போதைக்கு திருமலை நாயக்கா் மஹாலுக்கு மாற்ற உள்ளோம். சீனாவில் 4 தமிழ் வளா் மையங்கள் அமைக்க ஏற்பாடுகள் செய்யப்பட்டு வருகின்றன. இதுகுறித்து மத்திய அரசிடம் அனுமதி மற்றும் நிதி கேட்கப்பட்டுள்ளது என்றாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai