சென்னை மாவட்டத்துக்கு உள்பட்ட பகுதியில் மூடப்படாத ஆழ்துளைக் கிணறுகள் குறித்து புகைப்படத்துடன் வாட்ஸ் அப் (கட்செவி அஞ்சல்) மூலம் தகவல் தெரிவிக்கலாம் என மாவட்ட ஆட்சியா் ஆா்.சீதாலட்சுமி தெரிவித்துள்ளாா்.
திருச்சி மாவட்டம், நடுக்காட்டுப்பட்டியில் ஆழ்துளைக் கிணற்றில் விழுந்த சிறுவன் சுஜித் உயிரிழந்தான். இதைத் தொடா்ந்து, மாநிலம் முழுவதும் உள்ள பயனற்ற ஆழ்துளைக் கிணறுகளை மூட மாவட்ட ஆட்சியா்களுக்கு தமிழக அரசு உத்தரவிட்டுள்ளது. இதைத் தொடா்ந்து, சென்னை மாவட்டத்துக்கு உள்பட்ட பகுதியில் மூடப்படாத ஆழ்துளைக் கிணறுகள் குறித்து தகவல் தெரிவிக்கலாம் என மாவட்ட ஆட்சியா் ஆா்.சீதாலட்சுமி அறிவித்துள்ளாா். இதுதொடா்பாக அவா் புதன்கிழமை வெளியிட்ட செய்திக் குறிப்பில், ‘வடகிழக்குப் பருவமழையையொட்டி, மாவட்ட ஆட்சியரகம், பெருநகர சென்னை மாநகராட்சி அலுவலகங்களில் கட்டுப்பாட்டு அறை திறக்கப்பட்டுள்ளது. அதன்படி, மாநகராட்சி கட்டுப்பாட்டு அறையை 1913, மாவட்ட ஆட்சியா் கட்டுப்பாட்டு அறையை 1077, மின்வாரிய கட்டுப்பாட்டு அறையை 1912, காவல் துறை கட்டுப்பாட்டு அறையை 100, தீயணைப்புத் துறை கட்டுப்பாட்டு அறையை 101, 102 என்ற எண்களில் இலவசமாகத் தொடா்பு கொள்ளலாம். மேலும், பெருநகர சென்னைக் குடிநீா் மற்றும் கழிவுநீரகற்று வாரியத்தை 044 45674567 என்ற எண்ணிலும் தொடா்பு கொள்ளலாம்.
புகாா் அளிக்கலாம்: சென்னை மாவட்டத்துக்கு உள்பட்ட பகுதியில் மூடப்படாத ஆழ்துளைக் கிணறுகள் குறித்து கட்டணமில்லா தொலைபேசி எண் 1077, தொலைபேசி எண் 044 25243454 அல்லது 93840 56232 என்ற வாட்ஸ் அப் எண்ணுக்குப் புகைப்படத்துடன் புகாா் அளித்தால் உடனடியாக நடவடிக்கை எடுக்கப்படும் என தெரிவிக்கப்பட்டுள்ளது.