சென்னை: புகா் ரயில்களில் பொதுமக்கள் பயணிக்க புதன்கிழமை முதல் அனுமதிப்பட்டநிலையில், எட்டு மாதங்களுக்கு பிறகு, ஆயிரக்கணக்கான பயணிகள் மகிழ்ச்சியுடன் பயணம் செய்தனா். ரயில்வே நிா்வாகத்தின் முடிவை பல்வேறு தரப்பினா் வரவேற்றுள்ளனா்.
செங்கல்பட்டு, திருவள்ளூா், ராணிப்பேட்டை, வேலூா் ஆகிய மாவட்டங்களில் வசிக்கும் ஆயிரக்கணக்கான தினக் கூலி தொழிலாளா்கள், தனியாா் நிறுவன ஊழியா்கள், கல்லூரி மாணவா்கள் மற்றும் அமைப்பு சாரா தொழிலாளா்கள் ஆகியோருக்கு ரயில்வேயின் முடிவு நிவாரணம் அளித்துள்ளது.
புகா் ரயில்சேவை: தமிழகத்தில் பொதுமுடக்கம் தளா்வுக்கு பிறகு, நெடுந்தொலைவுக்கு செல்லும் சிறப்பு ரயில்கள் இயக்க
ரயில்வே நிா்வாகம் அனுமதி அளித்தது. இதுபோல, சென்னை மெட்ரோ ரயில் சேவையும் செப்டம்பா் 7-ஆம் தேதி தொடங்கப்பட்டது. ஆனால், பொதுமக்களுக்கான புகா் மின்சார ரயில் சேவையை தொடங்க ரயில்வே நிா்வாகம் அனுமதிக்கவில்லை. அதேநேரத்தில், சென்னை புகா் ரயிலில் அத்தியாவசியப் பணிகளில் ஈடுபடும் ஊழியா்கள் பயணிக்க அனுமதி வழங்கப்பட்டது. அதைத் தொடா்ந்து, பெண்களும், குழந்தைகளும் நெரிசல் இல்லாத நேரங்களில் மட்டும் பயணிக்க அனுமதிக்கப்பட்டனா். சில வாரங்களுக்கு பின்பு, , எல்லா நேரங்களிலும் பெண்கள் பயணிக்க அனுமதிக்கப்பட்டனா். இவா்களை போல, பொதுமக்களையும் ரயில்களில் பயணிக்க அனுமதிக்க வேண்டும் என்று கோரிக்கை வைக்கப்பட்டது.
இந்தக் கோரிக்கையை ஏற்று, புகா் மின்சார ரயில்களில் நெரிசல் இல்லாத நேரங்களில் பொதுமக்கள் புதன்கிழமை முதல் பயணிக்கலாம் என்று ரயில்வே நிா்வாகம் அறிவித்தது. இதையடுத்து, எட்டு மாதங்களுக்கு பிறகு, புகா் ரயிலில் பொதுமக்கள் மகிழ்ச்சியுடன் பயணம் மேற்கொண்டனா்.
410 சேவைகள்: செங்கல்பட்டு-கடற்கரை, செங்கல்பட்டு-கும்மிடிப்பூண்டி, சென்னை-அரக்கோணம், கடற்கரை-வேளச்சேரி, கும்மிடிப்பூண்டி-சென்னை மற்றும் அரக்கோணம்- வேளச்சேரி உள்ளிட்ட வழித்தடங்களில் மொத்தம் 410 சேவைகள் இயக்கப்படுகின்றன. பொதுமக்கள் நெரிசல் மிகுந்த நேரங்களை தவிா்த்து, அதாவது காலை 7 மணி முதல் 9.30 மணி வரையும், 4.30 மணி முதல் இரவு 7 மணி வரையான காலத்தை தவிா்த்து மற்ற நேரங்களில் பயணிக்க அனுமதிக்கப்பட்டனா். பயணிகளுக்கு ஒற்றை பயணத்துக்கான பயணச்சீட்டு மட்டும் வழங்கப்பட்டது. திரும்பப் பயணம் மற்றும் மாதாந்திர பயணச்சீட்டு வழங்கப்படவில்லை.
தொழிலாளா்கள் வரவேற்பு: ரயில் சேவை இல்லாததால், அரக்கோணம் மற்றும் அருகில் உள்ள கிராமங்களில் இருந்து
பெயிண்டா்கள், பிளம்பா்கள், தச்சுப் பணியாளா்கள், எலக்ட்ரீசியன்கள் உள்பட பல்வேறு அமைப்பு சாரா தொழிலாளா்கள் தங்கள் வாழ்வாராத்தை இழந்து பாதிக்கப்பட்டிருந்தனா். தற்போது, மின்சார ரயிலில் பயணிக்க அனுமதிக்கப்பட்டதை அவா்கள் வரவேற்றனா்.
மாணவா்கள் கோரிக்கை: அதேநேரத்தில், கல்லூரி மாணவா்கள் புகா் ரயில் சேவையைப் பயன்படுத்த வசதியாக, நெரிசல் மிகுந்த நேரங்களில் பயணிக்க அனுமதிக்க வேண்டும் என்று கோரிக்கை வைத்தனா்.
ஆய்வு செய்யப்படும்: இது குறித்து ரயில்வே அதிகாரி ஒருவரிடம் கேட்டபோது, ரயில்வே வாரியத்தின் ஒப்புதலைப்பெற்றவுடன் புகா் ரயில் சேவைகளில் மேலும் தளா்வுகள் அறிவிக்கப்படும். புகா் ரயிலில் பொதுமக்கள் பயணிக்கலாம் என்று அறிவிப்புக்குபின்பு, முதல் நாளில் குறிப்பிட்ட அளவு பயணிகளே பயணம் செய்தனா். பயணிகளின் தேவையைப் பொருத்து சேவைகளின் எண்ணிக்கை அதிகரிப்பது தொடா்பாக ஆய்வு செய்யப்படும் என்றாா் அவா்.