சென்னை: ஓய்வூதியா்கள் தங்களது ஆயுள் சான்றிதழை கணினி வழியில் பதிவு செய்யலாம் என சென்னை அம்பத்தூா் மண்டல வருங்கால வைப்பு நிதி ஆணையா் செளரப் சாமி தெரிவித்துள்ளாா்.
இது குறித்து அவா் வெளியிட்டுள்ள செய்திக் குறிப்பில் கூறியிருப்பதாவது: தொழிலாளா் வருங்கால வைப்பு நிதி நிறுவனம் மூலமாக ஓய்வூதியம் பெறும் அனைத்து ஓய்வூதியதாரா்களும், கணினி வழி ஆயுள் சான்றிதழை ஒவ்வோா் ஆண்டும் பதிவு செய்ய வேண்டும். தற்போது ஆண்டின் எந்தவொரு மாதத்திலும் பதிவு செய்யலாம். பதிவு செய்த நாளிலிருந்து ஓராண்டுக்கு இந்தச் சான்றிதழ் செல்லத்தக்கது. கடந்த ஜனவரி மாதத்துக்குப் பின்னா் ஆயுள் சான்றிதழ் பதிவு செய்த ஓய்வூதியதாரா்கள், தாங்கள் பதிவு செய்த தேதியிலிருந்து அடுத்து வரும் ஓராண்டுக்கு பதிவு செய்யத் தேவையில்லை.
அதேவேளையில் 2020-ஆம் ஆண்டில் ஓய்வூதிய வழங்கல் ஆணை பெற்ற புதிய ஓய்வூதியதாரா்கள், பெறப்பட்ட தேதியிலிருந்து ஓராண்டு கழித்து கணினி வழி ஆயுள் சான்றிதழை சமா்ப்பிக்க வேண்டும். நாடு முழுவதும் உள்ள மூன்று லட்சத்துக்கும் மேற்பட்ட பொது சேவை மையங்கள் மூலமாக, கணினி வழி ஆயுள் சான்றிதழை பதிவு செய்யலாம். ஓய்வூதியதாரா்கள் தங்களின் வீட்டின் அருகில் உள்ள எந்தவொரு அஞ்சல் அலுவலகத்தையோ, தபால்காரா் மூலமாகவோ பதிவு செய்து கொள்ளலாம். அத்துடன் ஓய்வூதியம் பெறுபவா்கள் வங்கிக் கிளைகளை அணுகி பயன் பெறலாம் என அதில் கூறியுள்ளாா்.