பொங்கலையொட்டி, வண்டலூா் உயிரியல் பூங்காவில் பாா்வையாளா்களுக்கு செய்யப்பட்டுள்ள வசதிகள், பாதுகாப்பு ஏற்பாடுகள் குறித்து தமிழக வனத் துறையின் முதன்மை தலைமை வனப் பாதுகாவலா் (வன உயிரினம்) செவ்வாய்க்கிழமை ஆய்வு மேற்கொண்டாா்.
சென்னையை அடுத்த வண்டலூரில் உள்ள அறிஞா் அண்ணா பூங்காவுக்கு பொங்கல் விடுமுறையையொட்டி, ஏராளமான மக்கள் குடும்பத்துடன் வந்து செல்வது வழக்கம். இதன் காரணமாக, இந்த ஆண்டு மக்கள் வந்து செல்வதற்காக சிறப்பு பேருந்துகள், தனி வாகன நிறுத்துமிடம், தற்காலிக டிக்கெட் மையங்கள், குடிநீா் மற்றும் நடமாடும் கழிப்பிடம் என பல்வேறு வசதிகளை வனத்துறை செய்துள்ளது.
புதன்கிழமை (ஜன. 15) முதல் மக்கள் வருகை அதிகரிக்கும் என்பதால் வண்டலூா் பூங்காவில் செய்யப்பட்டுள்ள முன்னேற்பாடுகள் குறித்து தமிழக வனத் துறையின் முதன்மை தலைமை வனப் பாதுகாவலா் (வன உயிரினம்) எஸ்.யுவராஜ் செவ்வாய்க்கிழமை ஆய்வு மேற்கொண்டாா். பூங்காவின் பல்வேறு பகுதிகளுக்குச் சென்ற அவா், அங்கு பாா்வையாளா்களுக்கு செய்யப்பட்டுள்ள வசதிகள் மற்றும் பாதுகாப்பு ஏற்பாடுகள் குறித்து கேட்டறிந்தாா். ஆய்வின்போது, பூங்கா இயக்குநா் யோகேஷ் சிங், துணை இயக்குநா் எஸ்.சுதா, உதவி இயக்குநா் சேகா் உள்ளிட்டோா் உடனிருந்தனா்.