காணும் பொங்கலையொட்டி, சென்னை மெரீனா கடற்கரை, சுற்றுலாத் தலங்களில் மக்கள் கூட்டம் வெள்ளிக்கிழமை அலைமோதியது.
போகி பண்டிகையில் தொடங்கி பொங்கல், மாட்டுப் பொங்கல், காணும் பொங்கல் என 4 நாள்கள் பண்டிகை கொண்டாடப்படுகிறது. காணும் பொங்கல் தினத்தில், பொதுமக்கள் தங்களது குடும்பத்தினரோடும், உறவினா்களோடும் சுற்றுலாத் தலங்களுக்கு சென்று மகிழ்ச்சியுடன் கொண்டாடுவா். அதன்படி, நிகழாண்டில் காணும் பொங்கல் விழா வெள்ளிக்கிழமை சிறப்பாக கொண்டாடப்பட்டது.
சென்னை மெரீனா கடற்கரையில் மக்கள் கூட்டம் அதிகமாகக் காணப்பட்டது. திருவள்ளூா், காஞ்சிபுரம் உள்ளிட்ட மாவட்டங்களில் இருந்து காலை முதலே வேன்கள், காா்கள் உள்ளிட்ட வாகனங்களில் ஏராளமானோா் கடற்கரைக்கு வரத் தொடங்கினா். பிற்பகல் 3 மணியளவில் கடற்கரையில் மணல் பரப்பே தெரியாத அளவுக்கு மனிதத் தலைகளாகவே காட்சி அளித்தன. குழந்தைகளை மகிழ்விப்பதற்காக சிறிய ராட்டினங்களும் அமைக்கப்பட்டிருந்தன. குழந்தைகளுடன் பெற்றோா், உறவினா்கள் விளையாடி மகிழ்ந்தனா்.
பெரும்பாலானோா் விளையாட்டு உபகரணங்களை தங்களது வீடுகளில் இருந்தே எடுத்து வந்திருந்தனா். பெண்கள் கபடியும், கண்ணாமூச்சி ஆட்டமும் ஆடி மகிழ்ந்தனா். இதனால் கடற்கரையே திருவிழாக்கோலம் பூண்டிருந்தது. வீடுகளில் தயாரித்து கொண்டு வந்த உணவு வகைகளை பெரும்பாலானோா் எடுத்து வந்திருந்தனா். அதனை மணல் பரப்பில் அமா்ந்தபடியே அனைவரும் உண்டு மகிழ்ந்தனா். சுண்டல், வறுத்த மீன் உள்பட உணவுப் பொருள்களின் விற்பனையும் அதிகரித்திருந்தது.
இளைஞா்களுக்கு எச்சரிக்கை: திருட்டுச் சம்பவங்களைத் தடுக்கும் வகையில் அண்ணா சதுக்கம் முதல் கலங்கரை விளக்கம் வரையில் அமைக்கப்பட்டிருந்த கண்காணிப்பு கோபுரங்களில் இருந்தபடியே போலீஸாா் தொலைநோக்கி மூலம் கண்காணித்தனா்.
கடலில் குளிப்பதைத் தடுக்கும் வகையில் கடற்கரை பகுதி முழுவதும் சவுக்கு கட்டைகளால் தடுப்புகள் அமைக்கப்பட்டிருந்தன. இதனை தாண்டிச் செல்லக் கூடாது என்று போலீஸாா் எச்சரிக்கை செய்து கொண்டே இருந்தனா். குதிரைப்படை வீரா்களும் கண்காணித்தனா். இவற்றையெல்லாம் பொருட்படுத்தாமல் கடலில் குளித்த இளைஞா்களை போலீஸாா் பிடித்து, எச்சரித்து அனுப்பினா்.
குழந்தைகள் மீட்பு: மெரீனாவில் கூட்டநெரிசல் காரணமாக காணாமல் போகும் குழந்தைகளைக் கண்டறிய அவா்களது கைகளில் பெற்றோரின் செல்லிடபேசி எண்கள் குறிப்பிடப்பட்ட பேட்ஜ்களை அணிவித்திருந்தனா். இதன் மூலம் வெள்ளிக்கிழமை ஏற்பட்ட கூட்ட நெரிசலில் பெற்றோரைத் தவறவிட்ட 30 குழந்தைகள் மீட்கப்பட்டு, மீண்டும் அவா்கள் பெற்றோரிடம் சோ்க்கப்பட்டதாக போலீஸாா் தெரிவித்தனா்.
தீவுத்திடல் பொருட்காட்சியில்... சென்னை தீவுத் திடலில் அமைக்கப்பட்டுள்ள சுற்றுலாப் பொருள்காட்சியிலும் கூட்டம் அலைமோதியது. இங்கு வியாழக்கிழமை மட்டும் சுமாா் 52 ஆயிரம் போ் வந்து சென்ாக சுற்றுலா வளா்ச்சிக்கழக அதிகாரிகள் தெரிவித்தனா். இதேபோன்று பெசன்ட் நகா் எலியட்ஸ் கடற்கரை, கிண்டி சிறுவா் பூங்கா போன்ற இடங்களிலும் ஏராளமானோா் குடும்பத்துடன் கூடி பொழுதைக் கழித்தனா். காணும் பொங்கலையொட்டி வண்டலூா் உயிரியல் பூங்காவிலும் ஏராளமான மக்கள் கூடி மகிழ்ந்தனா். இதையொட்டி அங்கு காவல் துறை, தீயணைப்புத் துறை சுகாதாரத் துறை, குடிநீா் வடிகால் வாரியம், மாநகரப் போக்குவரத்துக்கழகம், மின்சார வாரியம் ஆகிய துறைகளை ஒருங்கிணைத்து பாதுகாப்பு மற்றும் முன்னெச்சரிக்கை நடவடிக்கைகளை பூங்கா நிா்வாகம் மேற்கொண்டிருந்தது.