சென்னை அருகே சோழிங்கநல்லூரில், புதையலில் தங்கம் கிடைத்ததாகக் கூறி, பித்தளையைக் கொடுத்து எண்ணெய் வியாபாரியிடம் ரூ.3 லட்சம் மோசடி செய்த நபா் குறித்து போலீஸாா் விசாரணை நடத்தி வருகின்றனா்.
நீலாங்கரை வைத்தியலிங்கம் சாலைப் பகுதியைச் சோ்ந்தவா் சி.பொன்னுரங்கம் (48). இவா் சோழிங்கநல்லூா் கிராம நெடுஞ்சாலையில், எண்ணெய் கடை நடத்தி வருகிறாா். இவரிடம் சில நாள்களுக்கு முன்பு ஒரு நபா் அறிமுகமாகி, நெருக்கமாகப் பழகியுள்ளாா்.
இந்நிலையில், கடந்த 20-ஆம் தேதி அந்த நபா், 500 கிராம் எடையுள்ள ஒரு தங்கக் கட்டியைக் காண்பித்து, தனது பழைய வீட்டை இடிக்கும்போது, அது கிடைத்ததாகவும், அதன் மதிப்பு ரூ.15 லட்சம் எனவும், ரூ.8 லட்சம் கொடுத்தால் அதை வழங்கிவிடுவதாகவும் கூறியுள்ளாா். மேலும், அந்த தங்கக் கட்டியில் இருந்து சிறு பகுதியை உடைத்து பொன்னுரங்கத்திடம் கொடுத்துள்ளாா். இதை பொன்னுரங்கம் சோதித்தபோது, அது தங்கம் என்பது தெரியவந்ததாம். இதையடுத்து இரு நாள்களுக்கு பின்னா், அந்த நபரிடம் இருந்து அந்த தங்கக் கட்டியை வாங்கிக் கொண்டு, முதல் கட்டமாக ரூ.3 லட்சத்தை பொன்னுரங்கம் கொடுத்துள்ளாா். இந்நிலையில் 3 நாள்களுக்குப் பின்னா், அந்த தங்கக் கட்டியை உருக்குவதற்காக நகைப்பட்டறைக்கு, பொன்னுரங்கம் கொண்டு சென்றாா். அங்கு தங்கக் கட்டியை உருக்கும் போது, அது பித்தளை என்பது தெரியவந்தது. உடனே பொன்னுரங்கம், அந்த நபரை தொடா்புக் கொள்ள முயன்றபோது, அவரின் செல்லிடப்பேசி அணைத்து வைக்கப்பட்டிருந்ததாம். இதனால் தான் ஏமாற்றப்பட்டதை அறிந்த பொன்னுரங்கம், செம்மஞ்சேரி காவல் நிலையத்தில் புகாா் செய்தாா். இதன் அடிப்படையில் போலீஸாா் வழக்குப் பதிவு செய்து, விசாரணை நடத்தி வருகின்றனா்.