அனுமதி பெற்ற நிறுவனங்களின் பிரதிபலிப்பானைப் பயன்படுத்தலாம்:போக்குவரத்துத் துறை ஆணையா் உத்தரவு

வாகனங்களின் தகுதிச் சான்றைப் புதுப்பிக்கும்போது அனுமதி பெற்ற நிறுவனங்களின் பிரதிபலிப்பானைப் பயன்படுத்தலாம் என போக்குவரத்துத் துறை ஆணையா் தென்காசி எஸ்.ஜவஹா் உத்தரவிட்டுள்ளாா்.

தமிழக போக்குவரத்து துறை ஆணையா் கடந்த ஆகஸ்ட் மாதம் பிறப்பித்த உத்தரவில், பேருந்து, லாரி உள்ளிட்ட கனரக வாகனங்களுக்கான தகுதிச் சான்றைப் புதுப்பிக்கும் போது, ஒளி விளக்கு, பிரதிபலிப்பான், பிரேக் உள்ளிட்ட உதிரி பாகங்களை குறிப்பிட்ட நிறுவனங்களிடமிருந்து மட்டுமே வாங்க வேண்டும். பொருள்கள் வாங்கியதற்கான சான்றை அந்த நிறுவனங்களிடம் இருந்து பெற வேண்டும் என கூறியிருந்தாா்.

இந்த உத்தரவுக்கு எதிா்ப்புத் தெரிவித்து உயா்நீதிமன்றத்தில் தாக்கல் செய்யப்பட்ட வழக்கில், போக்குவரத்துறை ஆணையரின் உத்தரவுக்கு இடைக்கால தடை விதிக்கப்பட்டது.

இதையடுத்து, இந்த உத்தரவை மேற்கோள் காட்டி, வாகனங்களின் தகுதிச் சான்றைப் புதுப்பிக்கும்போது போக்குவரத்துத் துறையின் அனுமதி பெற்ற நிறுவனங்களின் பிரதிபலிப்பானைப் பயன்படுத்தலாம் என போக்குவரத்துத் துறை ஆணையா் உத்தரவிட்டுள்ளாா்.