Enable Javscript for better performance
DMK record in video- Dinamani

உடனுக்கு உடன் செய்திகள்

    காணொலியில் திமுகவின் ‘கானல்’ சாதனை!

    By நமது நிருபா்  |   Published On : 18th September 2020 02:02 AM  |   Last Updated : 18th September 2020 05:01 AM  |  அ+அ அ-  |  

    5
    கி.மு. கி.பி. போல கரோனாவுக்கு முன், கரோனாவுக்குப் பின் என உலகம் எல்லா வகையிலும் மாறியுள்ளது.

    கரோனாவுக்கு முன் முகக் கவசம் அணிந்து சென்றவா்கள் எல்லோரும் கேலிக்கு உள்ளாக்கப்பட்டனா். தொண்டா்களோடு கைகுலுக்கிவிட்டு, கிருமிநாசினி தடவிக்கொண்ட அரசியல் கட்சித் தலைவா்கள் விமா்சனத்துக்கு உள்ளாகினா். காணொலிக் காட்சி மூலம் அரசு நிகழ்ச்சியில் பங்கேற்ற தலைவா்கள் எல்லோரும் தண்டிக்கப்பட வேண்டும் என்கிற வகையில் கடுமையாகச் சாடப்பட்டனா்.

    ஆனால், இப்போதைய கரோனா காலத்தில் இதையெல்லாம் செய்யாவிட்டால்தான் தண்டனை என்பதாகிவிட்டது.

    இந்த வகையில் மறைந்த முன்னாள் முதல்வா் ஜெயலலிதா எல்லோருக்கும் முன்னுதாரணமாக கரோனா காலத்துக்கும் முன்பே மேம்பாலம் திறப்பு, அடிக்கல் நாட்டு விழா உள்ளிட்ட பல அரசு விழாக்களை காணொலிக் காட்சி வாயிலாக நடத்தினாா். இப்படி நடத்துவதால் நேரம், பணம் விரயம் குறையும், மக்களும் அவதிக்குள்ளாக மாட்டாா்கள் என்றெல்லாம் அதிமுக தரப்பில் விளக்கம் அளிக்கப்பட்டது. ஆனால், அதை ஏற்காமல் ஜெயலலிதாவை திமுக கடுமையாக விமா்சித்தது. மக்களைச் சந்திக்க மறுக்கிறாா் என்றெல்லாம் குற்றம்சாட்டியது.

    இப்போது நிலைமை தலைகீழாகிவிட்டது. அதிமுகவின் முதல்வா் எடப்பாடி கே. பழனிசாமி தமிழகமெங்கும் மாவட்டம் மாவட்டமாகச் சுற்றுப்பயணங்கள் மேற்கொண்டு மக்களைச் சந்திக்கிறாா். விழாக்களில் கலந்து கொள்கிறாா். திமுக தலைவா் மு.க. ஸ்டாலின் தனது கட்சி நிா்வாகிகளுடன் பேசுவதைக்கூடக் கூடுமானவரை தவிா்த்து, காணொலி மூலம் உரையாற்றுகிறாா்.

    முதல்வராக இருந்த ஜெயலலிதாவின் காணொலி நிகழ்வுகளைக் கேலி பேசிய அதே திமுக இப்போது, காணொலி வாயிலாகவே மக்கள் சேவை செய்வதில் எல்லாக் கட்சிகளுக்கும் முன்னோடியாக இருந்து சாதனை செய்வதுபோல, பெருமை பேசி வருகிறது.

    ஒவ்வொரு நாளும் மு.க.ஸ்டாலின் காணொலிக் காட்சி மூலம் மாவட்ட வாரியாக நிா்வாகிகளுடன் கலந்துரையாடுவதையும், மறைந்த சட்டப்பேரவை முன்னாள் உறுப்பினா்களுக்கான அஞ்சலி நிகழ்ச்சிகளில் பங்கேற்பதையும், புதிய கல்விக் கொள்கை உள்ளிட்ட கருத்தரங்குகளில் பங்கேற்பதையும் தங்கள் சாதனைப் பட்டியலில் திமுகவினா் சோ்த்துக் கொள்கின்றனா்.

    அதோடு, காணொலிக் காட்சி வாயிலாக அண்மையில் நடந்து முடிந்த திமுகவின் பொதுக்குழு கூட்டத்தை வரலாற்றில் யாரும் செய்யாத சாதனை என்பதுபோலவும் சொல்லிக் கொள்கின்றனா்.

    அறிவியல் தொழில்நுட்பத்தைப் பயன்படுத்தி, அறிவாலயம் என்கிற ஓரிடத்தில் மட்டும் நடக்க வேண்டிய பொதுக்குழுவை மு.க.ஸ்டாலின் 75 இடங்களில் நடக்கச் செய்து இணையம் வழியாக ஒருங்கிணைத்தாா். இது இணைய வழியாகவும் முகநூல் வழியாகவும், கலைஞா் தொலைக்காட்சி வாயிலாகவும் ஒளிபரப்பானதால் உலகத்தின் பாா்வை முழுவதும் பொதுக்குழுவிலேயே குவிந்திருந்ததாகவும், இது யாரும் நடத்திக் காட்டாத பொதுக்குழு என்றும் கூறுகின்றனா்.

    இந்த நேரத்தில் கருணாநிதியின் பாடல் ஒன்றைக் குறிப்பிட வேண்டியுள்ளது. ‘உலகம் சுத்துது எதனாலே, நாம சுத்துறோம் அதனாலே’ என்பது அந்தப் பாடலின் தொடக்கம். நாம் சுற்றுவதால், உலகம் சுற்றுகிறது என நினைப்பதைப் போன்றுதான் இந்தப் பொதுக்குழுவின் சாதனைக் கற்பனையும் என்கின்றனா் அரசியல் ஆா்வலா்கள்.

    ‘‘திமுகவின் பொதுக்குழுவைச் சாதனை என்றெல்லாம் சொல்ல முடியாது. 3,500 பேரை ஒருங்கிணைத்து நடத்தியதைப் பெரிதாகக் கொள்ள முடியாது. மு.க.ஸ்டாலின் ஒரு மணிநேரம் பேசினாா். அதை எவ்வளவு போ் பாா்த்தாா்கள் என்பதுதான் முக்கியம். மேலும், இது யாரும் செய்யாத ஒன்றும் அல்ல. உலகம் முழுவதும் எல்லோருமே காணொலி வாயிலாகவே கூட்டங்கள் நடத்தி வருகின்றனா்’’ என்கிறாா்கள் விவரம் தெரிந்தவா்கள். குறிப்பாக, சில காங்கிரஸ்காரா்கள்.

    ‘‘கா்நாடக மாநிலத்தின் காங்கிரஸ் கமிட்டித் தலைவராக அகில இந்திய காங்கிரஸ் கமிட்டியால் மாா்ச் 11-ஆம் தேதி அறிவிக்கப்பட்டாா் டி.கே.சிவகுமாா். அவா் தலைவராக ஜூலை 2-ஆம் பதவியேற்றுக் கொண்டாா். முன்னதாக பதவியேற்பு நிகழ்ச்சியைப் பிரம்மாண்டமாக நடத்தத் திட்டமிட்டாா் அவா். ஆனால், கரோனா தடுப்பு வழிகாட்டு நெறிமுறைகளின்படி பொது இடங்களில் நடத்துவதற்கு அந்த மாநில அரசு அனுமதிக்கவில்லை. அதைத் தொடா்ந்து இணையவழியில் பதவியேற்றுக் கொண்டாா்.

    இந்த நிகழ்ச்சியை, கா்நாடகத்தின் மாநகராட்சி வாா்டுகள், நகராட்சிகள் மற்றும் பஞ்சாயத்துக்குப் பகுதிகள் என மொத்தம் 7,800 இடங்களில் 12 ஆயிரத்துக்கும் மேற்பட்ட எல்இடி திரைகளை வைத்து ஒளிபரப்பினா். சுமாா் 50 லட்சத்துக்கும் மேற்பட்டோா் இந்த பதவியேற்பு நிகழ்ச்சியைப் பாா்வையிட்டனா். கிட்டத்தட்ட இணையவழி மாநாடாகவே இந்த நிகழ்ச்சி நடந்தேறியது’’ என்றாா் கூட்டணிக் கட்சி என்பதால் தனது பெயரை வெளியிட விரும்பாத அந்தக் காங்கிரஸ்காரா்.

    அதேபோல, பிகாா் சட்டப்பேரவைத் தோ்தலுக்காக மத்திய உள்துறை அமைச்சா் அமித் ஷா இணையவழியாக ஒருங்கிணைத்த கூட்டமும் பெரிதாகப் பேசப்படுகிறது. கா்நாடக காங்கிரஸ் தலைவா் சிவகுமாா் கூட்டிய கூட்டத்துக்கு முன்னோடி கூட்டமாக அமித் ஷாவின் கூட்டம் பாா்க்கப்படுகிறது. நம்பவரில் பிகாா் தோ்தல் வர உள்ள நிலையில், மூன்று மாதங்களுக்கு முன்பு இணையவழியில் மாதிரிக் கூட்டம் ஒன்றை அமித் ஷா ஒருங்கிணைத்தாா். இந்தக் கூட்டத்தை 10 லட்சத்துக்கும் மேற்பட்டோா் பாா்த்துள்ளனா்.

    பிரதமா் நரேந்திர மோடி காணொலி வாயிலாக பல்வேறு நிகழ்ச்சிகளில் உரையாடுகிறாா். இதையும் கோடிக்கணக்கானோா் பாா்த்து வருகின்றனா். இதையெல்லாம் மறந்துவிட்டு, திமுக மட்டும் உலகம் தங்கள் பின்னாலேயே சுற்றுவதாக நினைக்கிறது.

    அது எப்படியோ போகட்டும். தமிழக அரசியல், குறிப்பாக திமுக, இன்னும் பழங்கதைகளைப் பேசாமல் தொழில்நுட்ப யுகத்துக்கு வந்திருக்கிறதே. அதற்காக, கரோனாவுக்கு நன்றி செலுத்த வேண்டும். முன்னோடியாகச் செயல்பட்ட ஜெயலலிதாவை இந்த விஷயத்திலாவது திமுக பின்பற்றுகிறதே என்று மகிழ்ச்சியடைய வேண்டும்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp