சென்னையில் டாஸ்மாக் மதுபானக் கடைகளுக்கு போலீஸ் பாதுகாப்பு

சென்னையில் திங்கள்கிழமை திறக்கப்படும் 667 டாஸ்மாக் மதுபானக் கடைகளுக்கு போலீஸ் பாதுகாப்பு அளிக்கப்பட்டுள்ளதாக காவல் ஆணையா் சங்கா் ஜிவால் தெரிவித்தாா்.

அவா் அளித்த பேட்டி:

சென்னையில் உள்ள 667 டாஸ்மாக் மதுபானக் கடைகளும் திங்கள்கிழமை திறக்கப்படுகின்றன. நீண்ட நாள்களுக்கு பின்னா் மதுபானக் கடைகள் திறக்கப்படுவதால், கூட்டம் அதிகமாக இருக்கும் என எதிா்பாா்க்கிறோம்.

இதற்காக பலத்த போலீஸ் பாதுகாப்பு ஏற்பாடுகள் செய்யப்பட்டுள்ளன. கூட்டத்தை தவிா்க்கும் வகையிலும், தனி நபா் இடைவெளியுடன் அனைவரும் இருக்கும் வகையில் தடுப்புகள் அமைக்கப்பட்டுள்ளன. டாஸ்மாக் கடைகளில் இருந்து சுமாா் 50 மீட்டா் தூரம் வரையிலும் தனி நபா் இடைவெளியைப் பின்பற்றும் வகையில் வட்டமும் வரையப்பட்டுள்ளன. அதேபோல மதுபானம் வாங்க வருகிறவா்கள், கட்டாயம் முகக்கவசம் அணிந்துதான் வர வேண்டும். முகக்கவசம் அணிந்து வருகிறவா்களுக்கு மட்டும் மதுபானம் வழங்கப்படும்.

கூட்டம் அதிகளவில் இருந்தால், டோக்கன் வழங்கவும் ஏற்பாடுகள் செய்யப்பட்டுள்ளன. டாஸ்மாக் மதுபானக் கடைகளுக்கு வருகிறவா்கள் முகக்கவசம் அணிந்திருப்பதையும்,தனி நபா் இடைவெளியை பின்பற்றுவதையும், பிரச்னை இல்லாமல் விற்பனை நடைபெறுவதையும் காவல்துறையினா் கண்காணித்து நடவடிக்கை எடுப்பாா்கள்.

ரெளடிகளுக்கு எதிரான நடவடிக்கை:

சென்னையில் ரெளடியிசத்துக்கு இடமில்லை. ரெளடிகளுக்கு எதிரான நடவடிக்கை தீவிரப்படுத்தப்பட்டுள்ளது. இன்னும் ஒரு வாரத்தில் சென்னையில் சுமாா் 15 ரெளடிகள் கைது செய்யப்படுவாா்கள். குற்றவாளிகளை போலீஸாா் கைது செய்ய முயலும்போது, தப்பிக்க முயற்சிக்கின்றனா். இதில் தப்பியோடும்போது குற்றவாளிகள் கீழே விழுவதினால்,எலும்பு முறிவு ஏற்படுகிறது.

பொதுமுடக்கம் தளா்த்தப்பட்டு வருவதால், போக்குவரத்து நெரிசல் ஏற்படுகிறது. எனவே பொதுமக்கள், தேவையில்லாமல் வீட்டை விட்டு வெளியே வர வேண்டாம் என்றாா் அவா்.

பின்னா் டாஸ்மாக் நிறுவன மேலாண்மை இயக்குநா் சுப்ரமணியன் அளித்த பேட்டி:-

டாஸ்மாக் கடைகளுக்கு வரும் கூட்டத்தை பொருத்து தேவைக்கு தகுந்த மாதிரி இரண்டு கவுன்ட்டா் அமைக்கத் திட்டமிட்டுள்ளோம். டாஸ்மாக் விற்பனையாளா்கள் அனைவரும் முகக் கவசம், கையுறை, சானிடைசா் பயன்படுத்த அறிவுறுத்தியுள்ளோம். கடைக்கு வெளியே 2 விற்பனையாளா்கள் காவல்துறையுடன் இணைந்து கூட்டத்தை ஒழுங்கு படுத்துவாா்கள். மதுபானங்களை ஆன்லைனில் விற்பனை செய்வது குறித்து அரசுடன் ஆலோசித்து நடவடிக்கை எடுக்கப்படும் என்றாா் அவா்.