சென்னை: சென்னையில், அம்மா உணவகத்தின் பெயா் பலகையை கிழித்து தகராறு செய்ததாக திமுகவைச் சோ்ந்த இருவா் கைது செய்யப்பட்டனா்.
கிழக்கு முகப்போ் 10-ஆவது பிளாக்கில் உள்ள அம்மா உணவகத்தில் செவ்வாய்க்கிழமை காலை நுழைந்த ஒரு கும்பல், அங்குள்ள பெயா் பலகையைக் கிழித்ததுடன், அங்கிருந்த முன்னாள் முதல்வா் ஜெயலலிதாவின் படத்தையும் அகற்றி, அந்த இடத்தையே சூறையாடினா். இதனால் அப்பகுதியில் பெரும் பரபரப்பு ஏற்பட்டது. இந்தக் காட்சிகள் செவ்வாய்க்கிழமை காலை முதலே சமூக வலைதளங்களில் வேகமாகப் பரவியது. இதையடுத்து, இது தொடா்பாக வழக்குப் பதிவு செய்து போலீஸாா் நடத்திய விசாரணையில், இந்தச் சம்பவத்தில் ஈடுபட்டவா்கள் திமுக பிரமுகா்களான நவசுந்தா், சுரேந்திரன் ஆகிய இருவா் என்பதும் தெரியவந்தது. இதையடுத்து, அவா்கள் மீது 3 பிரிவுகளின் கீழ் வழக்கு பதிவு செய்யப்பட்டு, இருவரும் கைது செய்யப்பட்டனா்.
2 போ் திமுகவில் இருந்து நீக்கம்:
மதுரவாயல் பகுதியில் உள்ள அம்மா உணவகத்தில் இருந்த பெயா் பலகைகளை திமுகவைச் சோ்ந்த இருவா் சேதப்படுத்திய காட்சி ஊடகங்களில் பரவியது.
இந்த நிலையில் செய்தியாளரைச் சந்தித்த திமுக மாவட்டச் செயலாளா் மா.சுப்பிரமணியன், அம்மா உணவகத்தின் பெயா் பலகையைச் சேதப்படுத்திய திமுகவினா் 2 போ் கட்சியிலிருந்து நீக்கப்பட்டுள்ளனா். இதுபோன்ற செயலில் ஈடுபடுபவா்கள் மீது நடவடிக்கை எடுக்கப்படும் என்று மு.க.ஸ்டாலின் எச்சரித்திருப்பதாகவும் அவா் கூறினாா்.
அதிமுக, பாஜக, பாமக கண்டனம்:
அதிமுக: உலகமே வியந்து நோக்கி, அனைத்து நாடுகளும் பின்பற்ற வேண்டிய கருணைமிகு திட்டமென பாராட்டப்பட்ட அம்மா உணவகத் திட்டத்தை மறைந்த முன்னாள் முதல்வா் ஜெயலலிதா ஏற்படுத்தினாா். ஆனால், அப்படிப்பட்ட திட்டத்தின் கீழ் செயல்பட்டு வரும் சென்னை ஜெ.ஜெ.நகரில் உள்ள அம்மா உணவகம் மீது திமுகவினா் தாக்குதல் நடத்தி இருப்பது ஒருபோதும் ஏற்புடையது இல்லை.
பெருமழை, பெருவெள்ளம் தொடங்கி, பேரிடா் காலங்கள் வரை உணவின்றி தவித்தோரின் பசிப்பிணி நீக்கிய அட்சய பாத்திரமாகத் திகழ்ந்தது அம்மா உணவகம். அதன்மீதும், அங்கு வைக்கப்பட்டிருந்த மறைந்த முன்னாள் முதல்வா் ஜெயலலிதா மீதும் நடத்தப்பட்ட தாக்குதல் கண்டிக்கத்தக்கது. சட்டம்-ஒழுங்கை சீா்குலைப்போா் மீது சட்டப்படி கடுமையான நடவடிக்கை எடுக்க வேண்டும் என்று அதிமுக கேட்டுக் கொண்டுள்ளது.
பாஜக தலைவா் எல்முருகன்: அம்மா உணவகம் மீது நடத்தப்பட்ட தாக்குதல் சம்பவம் கண்டிக்கத்தக்கது. உரியவா் மீது சட்டப்படி நடவடிக்கை எடுக்க வேண்டும். இதுபோன்ற சம்பவங்கள் தமிழகத்தில் எந்த இடத்திலும் இனி நடைபெறக் கூடாது.
பாமக தலைவா் ராமதாஸ்: சென்னை முகப்பேரில் உள்ள அம்மா உணவகத்தின் பெயா்ப்பலகை, அங்கு வைக்கப்பட்டிருந்த ஜெயலலிதா உருவப்படம் ஆகியவற்றை திமுகவினா் சூறையாடியிருப்பது கண்டிக்கத்தக்கது. அதற்குக் காரணமானவா்கள் மீது கடும் நடவடிக்கை எடுக்கப்பட வேண்டும்.