சென்னை: தமிழக முதல்வர் மு.க. ஸ்டாலின் இன்று தலைமைச் செயலகத்தில் உள்ள முதலமைச்சரின் தனிப்பிரிவுக்கு நேரில் சென்று திடீர் ஆய்வு மேற்கொண்டார்.
அப்போது, முதலமைச்சரின் தனிப்பிரிவில் மனு கொடுக்கக் காத்திருந்த மக்களின் கோரிக்கைகள் குறித்து கேட்டறிந்தார். மேலும், மனுக்களின் மீது விரைந்து தீர்வு காண வேண்டும் என அலுவலர்களை அறிவுறுத்தினார்.
தமிழக முதல்வர் மு.க. ஸ்டாலினிடம், பொதுமக்கள் தங்கள் புகார்களை நேரடியாக அளிக்கும் வகையில், தமிழக முதல்வரின் தனிப்பிரிவு தொடங்கப்பட்டது. இதற்காக இணையதளம் தொடங்கப்பட்டு, இணையம் வாயிலாகவும் புகார் அளிக்க வழிவகை செய்யப்பட்டது.
பொதுமக்களிடமிருந்து நேரடியாக புகார்களை பெறும் வகையில், உங்கள் தொகுதியில் முதல்வர் என்ற தனிப்பிரிவு உருவாக்கப்படும் என்று திமுக தேர்தல் பிரசாரத்தின் போது அளித்த வாக்குறுதியை நிறைவேற்றும் வகையில், இந்த சேவை உருவாக்கப்பட்டது குறிப்பிடத்தக்கது.