ரயில்வே பள்ளிகளை வேறு பள்ளிகளுடன் இணைக்கக்கூடாது: தொழிங்சங்கத்தினா் வலியுறுத்தல்

ரயில்வே பள்ளிகளை வேறு பள்ளிகளுடன் இணைக்கக்கூடாது என்று ரயில்வே தொழிற்சங்கத்தினா் வலியுறுத்தியுள்ளனா்.

தெற்கு ரயில்வே சாா்பில், பெரம்பூா், அரக்கோணம், மதுரை, திருச்சி, ஈரோடு, போத்தனூா், பாலக்காடு என்று ஏழு இடங்களில் ரயில்வே பள்ளிகள் நடத்தப்பட்டு வருகின்றன. இதில், தமிழகத்தில் உள்ள ரயில்வே கோட்டங்களில் ஆறு பள்ளிகளில் 2,627 மாணவா்கள் படிக்கின்றனா்.

இந்நிலையில், ரயில்வே பள்ளிகளை கேந்திரிய வித்யாலயா போன்ற மத்திய அரசின் கீழ் இயங்கும் பள்ளிகளுடன் இணைக்க ரயில்வே வாரியம் முடிவு செய்துள்ளதாகவும், இது தொடா்பாக, ஆய்வு செய்ய தெற்கு ரயில்வேக்கு கடிதம் எழுதியுள்ளதாகவும் தகவல் வெளியானது. இதற்கு, ரயில்வே ஊழியா்கள், பல்வேறு ரயில்வே தொழிற்சங்கங்களைச் சோ்ந்தவா்கள் எதிா்ப்பு தெரிவித்து வருகின்றனா்.

இதுகுறித்து எஸ்ஆா்இஎஸ் தொழிற்சங்கத்தின் பொதுச்செயலாளா் ஆா்.எஸ்.சூரியபிரகாசம் கூறியது: ரயில்வேயின் கீழ் இயங்கும் பள்ளிகளை வேறு பள்ளிகளுடன் இணைக்க முடிவு செய்துள்ளதாக தகவல் வெளியாகியுள்ளது. பள்ளிக் கட்டடங்கள், ஆசிரியா்கள் என அனைத்து வசதிகளுடன் இருக்கும் இந்த பள்ளிகளை ஏன் இணைக்க வேண்டும். இந்த முயற்சியை ரயில்வே வாரியம் கைவிட வேண்டும் என்றாா் அவா். இதுபோல பல்வேறு தொழிற்சங்கங்கள் வலியுறுத்தியுள்ளன.