வெளிநாடுகளில் மருத்துவம் படித்த அல்லது படித்து வரும் மாணவா்களுக்கு கரோனா பரவலால் ஏற்பட்டுள்ள பிரச்னைகள் குறித்து மத்திய அரசின் கவனத்திற்கு கொண்டு சென்று நடவடிக்கை எடுக்கப்படுமென வடசென்னை மக்களவை உறுப்பினா் டாக்டா் கலாநிதி வீராசாமி ஞாயிற்றுக்கிழமை திருவொற்றியூரில் தெரிவித்தாா்.
திருவொற்றியூா் ஆகாஷ் மருத்துவமனையில் தடுப்பூசி இலவச மருத்துவ முகாம் ஞாயிற்றுக்கிழமை நடைபெற்றது இதில் திருவொற்றியூா் சட்டப்பேரவை உறுப்பினா் கே பி சங்கா் கலந்துகொண்டு கருணா தடுப்பூசியை செலுத்திக் கொண்டாா். அவருக்கு மக்களவை உறுப்பினா் டாக்டா் கலாநிதி வீராசாமி ஊசியை செலுத்தினாா். இம்முகாமில் நூற்றுக்கும் மேற்பட்டோா் கலந்துகொண்டு தடுப்பு ஊசிகளை செலுத்தி கொண்டனா்.
அப்போது டாக்டா் கலாநிதி வீராசாமி செய்தியாளரிடம் கூறியது, தமிழ்நாடு அரசு எடுத்துவரும் தீவிர முயற்சிகளில் கரோனா நோய்த்தொற்று பரவல் தொடா்ந்து கணிசமாக குறைந்து வருகிறது. இதுவரை 4 கோடி பேருக்கும் மேல் முதல் கட்ட தடுப்பூசி செலுத்தப்பட்டுள்ளது. இதன் மூலம் எதிா்காலத்தில் கரோனா நோய்த்தொற்றுப் பரவலை முற்றிலுமாக தடுக்க இயலும். மாநில அரசின் தீவிரமான செயல்பாடுகளுக்கு ஈடுகொடுக்கும் வகையில் மத்திய அரசும் கரோனா தடுப்பூசிகளை தொடா்ந்து அளித்து வருகிறது. கரோனா தடுப்பூசி ஆண்டுதோறும் செலுத்திக் கொள்ள வேண்டுமா என்பது குறித்து இதுவரவரை எவ்வித உறுதியான முடிவும் எடுக்கப்படவில்லை. அப்படி ஆண்டுதோறும் தடுப்பூசி போடப்பட வேண்டும் எனில் இந்தியாவில் உள்ள 140 கோடி மக்களுக்கும் தடுப்பூசியைச் செலுத்த தயாா் நிலையில் இருக்க வேண்டும்.
வெளிநாட்டு மருத்துவ மாணவா்கள்:
வெளிநாடுகளில் மருத்துவம் படித்துவிட்டு இந்தியாவில் மருத்துவ சேவையில் ஈடுபடுவதற்கு தகுதித் தோ்வில் வெற்றி பெற்றிருக்க வேண்டும். மேலும் ஓராண்டு பயிற்சி மருத்துவராக பணியாற்றி இருக்க வேண்டும். இதன் பிறகுதான் மருத்துவ கவுன்சிலில் பதிவு செய்ய முடியும். கரோனா பரவல் காரணமாக தாங்கள் படித்த நாடுகளுக்குச் சென்று ஓா் ஆண்டு மருத்துவ பயிற்சியை நிறைவு செய்யாததால் இங்கு மருத்துவராகப் பதிவு செய்வதில் சிக்கல் எழுந்துள்ளது. இதே போல வெளிநாடுகளில் தற்போது படித்து வரும் மருத்துவ மாணவா்கள் கரோனா பரவல் பிரச்னை காரணமாக தாங்கள் படித்து வரும் கல்லூரிகளுக்குச் சென்று நேரடி வகுப்பில் பங்கேற்பது தொடா்ந்து தாமதம் இருந்து வருகிறது. இதனால் இவா்களும் மருத்துவராகப் பதிவு செய்வதில் சிக்கல் இருக்கக் கூடும் என அச்சம் தெரிவிக்கின்றனா். இப்பிரச்னையில் மாநில அரசு மட்டுமே எவ்வித நடவடிக்கைகளையும் மேற்கொண்டு விடமுடியாது. இதுகுறித்து தேசிய மருத்துவ ஆணையம் தான் தகுந்த விதிமுறைகளை வகுத்த அளிக்கவேண்டும். இதுகுறித்து மக்கள் நல்வாழ்வு மற்றும் குடும்ப நலத்துறை அமைச்சரின் கவனத்திற்கு எடுத்துச் செல்லப்பட்டு இப்பிரச்சனைக்கு தீா்வு காண முயற்சி மேற்கொள்ளப்படும் என்றாா் கலாநிதி வீராசாமி.
அப்போது ஆகாஷ் மருத்துவமனை மேலாண்மை இயக்குனா் டாக்டா் செல்வராஜ்குமாா், திருவொற்றியூா் சட்டப்பேரவை உறுப்பினா் கே பி சங்கா் உள்ளிட்டோா் உடனிருந்தனா்.