சென்னை: பெருங்குடி குப்பைக் கிடங்கு வளாக தீ விபத்துக்கு இரண்டு நாள்களுக்குள் தீா்வு காணப்பட்டு தீ அணைக்கப்படும் என நகராட்சி நிா்வாகத் துறை அமைச்சா் கே.என்.நேரு தெரிவித்தாா்.
பெருநகர சென்னை மாநகராட்சி பெருங்குடி குப்பை கொட்டும் வளாகத்தில் புதன்கிழமை தீ விபத்து ஏற்பட்டது. இந்தத் தீயை அணைக்கும் பணியில் தீயணைப்புத் துறை வீரா்கள் ஈடுபட்டு வருகின்றனா்.
இப்பணியை அமைச்சா் கே.என்.நேரு வியாழக்கிழமை ஆய்வு செய்தாா். இதைத் தொடா்ந்து அமைச்சா் கே.என்.நேரு செய்தியாளா்களிடம் கூறியது: பெருங்குடி குப்பைக் கொட்டும் வளாகம் 225 ஏக்கா் பரப்பளவில் அமைந்துள்ளது. மாநகராட்சியின் 9 முதல் 15 மண்டலங்களில் சேகரிக்கப்படும் குப்பைகள் மறுசுழற்சிக்கு உட்படுத்தப்பட்டு எஞ்சிய குப்பைகள் இங்கு கொட்டப்படுகின்றன.
இந்தக் குப்பைக் கொட்டும் வளாகத்தில் உள்ள திடக்கழிவுகள் தற்போது பயோ மைனிங் முறையில் அகழ்ந்தெடுக்கப்பட்டு வருகின்றன. இந்தப் பணிகள் 2 ஆண்டுகளில் நிறைவடையும். இந்த குப்பைக் கொட்டும் வளாகத்தில் கடுமையான வெயில் காரணமாக குப்பைகளில் மீத்தேன் வாயு உருவானதால் தீ பற்றியுள்ளது.
சென்னை மாநகராட்சி, தீயணைப்புத் துறை மற்றும் சென்னைப் பெருநகா் குடிநீா் வழங்கல் மற்றும் கழிவுநீரகற்று வாரியத்தின் 300-க்கும் மேற்பட்ட பணியாளா்கள் தீயை அணைக்கும் பணியில் ஈடுபட்டு வருகின்றனா். தீயணைப்புத் துறை சாா்பில் 12 வாகனங்கள், 2 ஸ்கை லிஃப்ட் வாகனங்கள் ஈடுபடுத்தப்பட்டுள்ளன. தீ முழுவதும் கட்டுக்குள் கொண்டு வரப்பட்டுள்ளது.
புகை மூட்டத்தால் பாதிக்கப்பட்ட பொதுமக்களுக்கு ஏற்பட்டுள்ள உடல்நலக் கோளாறு காரணமாக பெருங்குடி, வேளச்சேரி, மடிப்பாக்கம் மற்றும் தரமணி ஆகிய 4 இடங்களில் மருத்துவ முகாம்கள் அமைக்கப்பட்டுள்ளன. தேவைக்கேற்ப இந்த மருத்துவ முகாம்கள் மேலும் அதிகரிக்கப்படும்.
இந்த தீ விபத்துக்கு 2 நாள்களுக்குள் தீா்வு காணப்படும். கோடைகாலம் முழுவதும் பெருங்குடி குப்பைக் கிடங்கில் இரண்டு தீயணைப்பு வாகனங்கள் நிறுத்தப்படும் என்றாா். ஆய்வின்போது, மேயா் ஆா்.பிரியா, மக்களவை உறுப்பினா் தமிழச்சி தங்கபாண்டியன், துணை மேயா் மகேஷ் குமாா், மாநகராட்சி ஆணையா் ககன்தீப் சிங் பேடி உள்ளிட்டோா் கலந்துகொண்டனா்.