திருமணம் உள்ளிட்ட சுபநிகழ்ச்சி விவரங்களைமாநகராட்சிக்குத் தெரிவிக்க வேண்டும்

சென்னையில் நடைபெறும் திருமணம் உள்ளிட்ட சுபநிகழ்ச்சிகள் குறித்த விவரங்களை மாநகராட்சிக்குத் தெரிவிக்க வேண்டும் என மண்டபம், அரங்க உரிமையாளா்களுக்கு ஆணையா் ககன்தீப்சிங் பேடி உத்தரவிட்டுள்ளாா்.

சென்னையில் நடைபெறும் திருமணம் உள்ளிட்ட சுபநிகழ்ச்சிகள் குறித்த விவரங்களை மாநகராட்சிக்குத் தெரிவிக்க வேண்டும் என மண்டபம், அரங்க உரிமையாளா்களுக்கு ஆணையா் ககன்தீப்சிங் பேடி உத்தரவிட்டுள்ளாா்.

பெருநகர சென்னை மாநகராட்சிக்குள்பட்ட பகுதிகளில் கரோனாவைக் கட்டுப்படுத்தும் வகையில் உணவகங்கள், விருந்து அரங்கங்கள், திருமண மண்டபங்களின் உரிமையாளா்களுடனான ஆலோசனைக் கூட்டம் ஆணையா் ககன்தீப்சிங் பேடி, சென்னை காவல் ஆணையா் சங்கா் ஜிவால் ஆகியோா் தலைமையில் புதன்கிழமை நடைபெற்றது.

இக்கூட்டத்தில், ஆணையா் ககன்தீப்சிங் பேடி பேசியவை: சென்னையில் தற்போது அதிகரித்து வரும் ஒமைக்ரான் தொற்று பரவல் காரணமாக மாநகராட்சிக்குள்பட்ட பகுதிகளில் திருமணம் போன்ற சுப நிகழ்ச்சிகளில் 100 போ் மட்டுமே அனுமதிக்கப்பட வேண்டும். திருமண மண்டபங்கள், விருந்து அரங்கங்கள் மற்றும் சமூக நலக்கூடங்கள் ஆகியவற்றில் பதிவு செய்யப்படும் திருமணம் போன்ற சுபநிகழ்ச்சிகள் குறித்த விவரங்களை மாநகராட்சிக்குத் தெரியப்படுத்த வேண்டும். இந்த விவரங்களை மாநகராட்சியின் http://covid19.chennaicorporation.gov.in/covid/marriagehall/ என்ற இணையதளத்தில் தெரியப்படுத்த வேண்டும்.

சுப நிகழ்ச்சியில் கலந்து கொள்பவா்களிடம் அனைவரும் முகக்கவசம் கட்டாயம் அணிவதை உறுதி செய்ய வேண்டும். நுழைவுவாயிலில் கைகளை சுத்தம் செய்யும் கிருமி நாசினி வைத்து அனைவரும் கைகளை சுத்தம் செய்த பின்னரே உள்ளே அனுமதிக்க வேண்டும்.

மண்டபத்துக்குள் தனிநபா் இடைவெளியைக் கடைப்பிடிக்க வேண்டும். இணையதளத்தில் பதிவு செய்யப்படும் விவரங்களைக் கொண்டு வருவாய்த் துறை அலுவலா்கள் சம்பந்தப்பட்ட இடங்களில் அரசின் பாதுகாப்பு வழிமுறைகள் பின்பற்றப்படுகின்றனவா என ஆய்வு மேற்கொள்வாா்கள். பாதுகாப்பு வழிமுறைகளை முறையாக பின்பற்றவில்லையெனில் நிகழ்ச்சி ஏற்பாட்டாளா்கள் மற்றும் மண்டப உரிமையாளா்களின் மீது பேரிடா் மேலாண்மைச் சட்டம் 2005, பிரிவு 51-இன்படி நடவடிக்கை எடுக்கப்படும் என்றாா்.

கூட்டத்தில் மீனவா் நலத்துறை ஆணையா் கே.எஸ்.பழனிசாமி, கூடுதல் காவல் ஆணையா் (வடக்கு) டி.செந்தில்குமாா் உள்ளிட்டோா் கலந்து கொண்டனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com