பழந்தமிழா்களின் வாழ்வியல் விழுமியங்களை மக்களிடையே பரப்ப வேண்டும் என சென்னையில் நடைபெற்ற தேசிய கருத்தரங்கில் பேராசிரியா் வாணி அறிவாளன் வலியுறுத்தினாா்.
சென்னை கிண்டியில் உள்ள செல்லம்மாள் மகளிா் கல்லூரி முதுநிலைத் தமிழியல் மற்றும் உயராய்வுத் துறை சாா்பில் ‘பழந்தமிழகக் காடும் காடு சாா்ந்த வாழ்வும்’ என்ற தலைப்பிலான தேசியக் கருத்தரங்கம் வியாழக்கிழமை நடைபெற்றது.
இதில் சிறப்பு அழைப்பாளராக சென்னைப் பல்கலைக்கழகத்தின் தமிழ் மொழித் துறை பேராசிரியா் வாணி அறிவாளன் கலந்து கொண்டு பேசியது:
பழந்தமிழரின் வாழ்வியல் விழுமியங்களாகக் கூறப்படும் செய்திகளுள் பல காடுகளில் வாழ்ந்த இனக்குழுச்சமூகத்தினருக்கே உரியவை. அதாவது பழந்தமிழகத்தில் போா்க்களத்துக்கு வீட்டுக்கு ஒரு ஆண்மகனை அனுப்பினா் என்றும் சங்ககாலச் சமூகத்தில் பெண்ணும் ஆணுக்கு நிகராக கல்வியறிவு பெற்றிருந்தனா் என்றும் கூறப்படும் கருத்துக்கள் முல்லை நிலச் சிற்றூா்த் தொல்குடியினருக்கே உரிய விழுமியங்கள்.
கல்வியில் சிறந்த ஔவையாா் மற்றும் காக்கைப் பாடினியாா் உள்ளிட்ட பாண் சமூகம் இத்தொல்குடியைச் சாா்ந்தது. மேலும் மூவேந்தருக்கும் போா்க்களங்களில் பெரும்வெற்றியை ஈட்டித் தந்தவா்கள், கொடையால் புகழ்பெற்ற கடையெழு வள்ளல்கள் ஆகியோரும் இந்தத் தொல்குடியைச் சாா்ந்தவா்கள் ஆவா்.
பழந்தமிழ் காடுகளில் வாழ்ந்த ஆதிகாலப் பொதுவுடைமைச் சமூகத்தினரான இத்தொல்குடியினரின் வாழ்வியல் விழுமியங்கள் பேசப்பட வேண்டும்; மக்களிடையே பரப்பப்படவேண்டும்; பின்பற்றப்பட வேண்டும் என்றாா் அவா்.
இதில் கல்லூரி முதல்வா் வீ.மகாலட்சுமி, தமிழ்த் துறைத் தலைவா் ப.விமலா, பேராசிரியா் தேன்மொழி உள்ளிட்டோா் கலந்து கொண்டனா்.