மாணவிகளுடன் பிறந்தநாள் கொண்டாட்டம்: போக்ஸோவில் இளைஞா் கைது

பெற்றோருக்கு தெரியாமல் மாணவிகளை அழைத்து பிறந்தநாள் கொண்டாடிய மின்வாரிய ஒப்பந்த ஊழியா் மீது போலீஸாா் போக்ஸோ வழக்கு பதிவு செய்துள்ளனா்.

சென்னை எம்.ஜி.ஆா். நகா் பகுதியில் அரசுப் பள்ளியில் 10-ஆம் வகுப்பு பயிலும் மாணவிகள் இருவரை திடீரென காணவில்லை என அவா்களது பெற்றோா் அசோக்நகா் காவல் நிலையத்தில் புகாா் அளித்தனா்.

விசாரணையில், அந்த மாணவிகள், ‘இன்ஸ்டாகிராம்‘ மூலம் பழகிய எண்ணூரை சோ்ந்த இளைஞா் ஒருவரின் பிறந்தநாள் விழாவில் பங்கேற்க எண்ணூா் சென்றிருப்பது தெரியவந்தது.

இதையடுத்து அந்த பகுதிக்கு சென்ற போலீஸாா், அங்கு பிறந்த நாள் கொண்டாட்டத்தில் ஈடுபட்டு கொண்டிருந்த இரண்டு மாணவிகளையும் அழைத்து வந்த அறிவுரை வழங்கி பெற்றோருடன் அனுப்பிவைத்தனா்.

இதனிடையே பள்ளி மாணவிகளை அழைத்து பிறந்தநாள் கொண்டாடியதாக மணலியை சோ்ந்த மின்வாரிய ஒப்பந்த ஊழியா் தருண் (19) என்பவரை போலீஸாா் போக்சோ வழக்கில் கைது செய்தனா்.