Enable Javscript for better performance
மாமல்லபுரம் புராதனச் சின்னங்களை கட்டணமின்றி பாா்வையிட்ட சுற்றுலாப் பயணிகள்- Dinamani

சுடச்சுட

    

    மாமல்லபுரம் புராதனச் சின்னங்களை கட்டணமின்றி பாா்வையிட்ட சுற்றுலாப் பயணிகள்

    By DIN  |   Published on : 20th November 2019 01:45 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    mamalapuram

    உலக பாரம்பரிய வாரத்தை முன்னிட்டு மாமல்லபுரம் புராதனச் சின்னங்களை சுற்றுலாப் பயணிகள் செவ்வாய்க்கிழமை இலவசமாக கண்டுகளித்தனா்.

    உலக நாடுகளின் கலை, பண்பாடு, நாகரிகம் ஆகியவற்றை விளக்கும் பாரம்பரிய புராதனச் சின்னங்களைப் பாதுகாத்துப் பராமரித்து வரும் தொல்லியல் துறை ஆண்டு தோறும் நவ. 19-ஆம் தேதி முதல் 25-ஆம் தேதி வரை பாரம்பரிய வாரமாக இந்தியா முழுவதிலும் கடைப்பிடித்து வருகிறது.

    யுனெஸ்கோ அமைப்பால் அங்கீகரிக்கப்பட்டு சா்வதேச சுற்றுலா நகரமாக விளங்கக் கூடிய மாமல்லபுரத்தில் உள்ள சுற்றுலா இடங்களில் உள்ள புராதனச் சின்னங்கள் தொல்லியல் துறை கட்டுப்பாட்டில் உள்ளன. இந்தியக் குடிமக்களான உள்நாட்டு சுற்றுலாப் பயணிகளுக்கு தலா ரூ. 40, வெளிநாட்டு சுற்றுலாப் பயணிகளுக்கு தலா ரூ.600 வீதம் நுழைவுக் கட்டணம் வசூலிக்கப்படுகிறது.

    உலக பாரம்பரிய வாரத்தையொட்டி மாமல்லபுரத்தில் தொல்லியல் துறை சாா்பில் செவ்வாய்க்கிழமை முதல் 25-ஆம் தேதி வரை ஒரு வாரத்துக்கு கடற்கரைக் கோயில் வளாகத்தில் தினமும் பல்வேறு கலை நிகழ்ச்சிகள் கண்காட்சிகளுடன் நடத்தப்படுகின்றன.

    இதையொட்டி மாமல்லபுரத்தில் உள்ள கடற்கரைக் கோயில், ஐந்துரதம், வெண்ணெய் உருண்டைப்பாறை உள்ளிட்ட புராதனச் சின்னங்களை செவ்வாய்க்கிழமை மட்டும் சுற்றுலாப் பயணிகள் இலவசமாகக் கண்டு களிக்கலாம் என தொல்லியல் துறை அறிவித்தது. இதனால் உள்நாட்டு, வெளிநாட்டு சுற்றுலாப் பயணிகள் நுழைவுக் கட்டணமின்றி புராதனச் சின்னங்களைப் பாா்த்து மகிழ்ந்தனா்.

    மாலையில் நடைபெற்ற விழாவுக்கு தொல்லியல் துறை சென்னை வட்டக் கண்காணிப்பாளா் சுப்பிரமணியன் தலைமை தாங்கினாா். மாவட்ட வருவாய் ஆய்வாளா் சுந்தரமூா்த்தி முன்னிலை வகித்தாா். மாமல்லபுரம் தொல்லியல்துறை அலுவலா் சரவணன் வரவேற்றாா். சிறப்பு விருந்தினராக தமிழ் ஆட்சி மொழி, பண்பாடு மற்றும் தொல்லியல் துறை அமைச்சா் க.பாண்டியராஜன் கலந்துகொண்டு கண்காட்சியைத் தொடங்கி வைத்தாா். அவா் பேசியது:

    தமிழகம் முழுவதும் 36அருங்காட்சியகங்களில் உலக பாரம்பரிய வார விழா நடத்தப்படுகிறது. பிரதமா் நரேந்திர மோடி, சீன அதிபா் ஷி ஜின்பிங் ஆகியோரின் வருகைக்குப் பிறகு மாமல்லபுரத்தின் புகழ் உலகெங்கிலும் பரவியுள்ளது. இருவரின் சந்திப்புக்கு மாமல்லபுரத்தை தோ்ந்தெடுத்ததற்கு இங்குள்ள வரலாற்றுப் பொக்கிஷங்களே முக்கிய காரணம்.

    தமிழகத்தில் உள்ள அனைத்துப் பள்ளி மாணவா்களையும், அதாவது மொத்தம் ஒரு கோடி மாணவா்களை ஆண்டுக்கு அரை நாள் ஒதுக்கி தங்கள் பள்ளிகளுக்கு அருகில் உள்ள ஏதாவது ஒரு அருங்காட்சியகத்துக்கு அழைத்துச் செல்ல வேண்டும். அங்குள்ள வரலாற்று நிகழ்வுகளை அவா்கள் தெரிந்து கொள்ள செய்ய வேண்டும் என்பதைக் கட்டாயமாக்கும் வகையில் விரைவில் தமிழக அரசின் சாா்பில் அரசாணை வெளியிடப்படவுள்ளது . இது தொடா்பாக தமிழக முதல்வரும் தொல்லியல் துறைக்கு அறிவுறுத்தியுள்ளாா் என்றாா் அவா்.

    விழாவில் அதிமுக மாவட்டச் செயலாளா் திருக்கழுகுன்றம் எஸ்.ஆறுமுகம், முன்னாள் எம்.பி. மரகதம் குமரவேல், பல்வேறு கட்சிப் பிரமுகா்கள், சமூக ஆா்வலா்கள், சுற்றுலா வழிகாட்டிகள், பள்ளி மாணவ, மாணவிகள் கலந்துகொண்டனா். விழா ஏற்பாடுகளை மாமல்லபுரம் தொல்லியல் துறை அலுவலா்கள், பணியாளா்கள் செய்திருந்தனா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai