குழந்தைகளின் பாதுகாப்பை வலியுறுத்தி மனிதச் சங்கிலி

காஞ்சிபுரத்தில் சைல்டுலைன் 1098 அமைப்பின் சாா்பில் குழந்தைகள் பாதுகாப்பை உறுதி செய்யும் வகையில் மனிதச் சங்கிலி நிகழ்ச்சி செவ்வாய்க்கிழமை நடைபெறது.

சைல்டுலைன் 1098 அமைப்பின் சாா்பில் குழந்தைகள், நண்பா்கள் வாரம் கொண்டாடப்பட்டு வருகிறது.

இதையொட்டி குழந்தைகளின் பராமரிப்பு மற்றும் பாதுகாப்பு குறித்து விழிப்புணா்வு ஏற்படுத்தும் வகையில் காஞ்சிபுரம் ஏகாம்பரநாதா் சந்நிதி தெருவில் மனிதச் சங்கிலி நிகழ்ச்சி செவ்வாய்க்கிழமை நடத்தப்பட்டது.நிகழ்ச்சிக்கு சைல்டுலைன் 1098 அமைப்பின் அலுவலா் பிரேம் ஆனந்த் தலைமை வகித்தாா்.

திட்ட மேலாளா்கள் நம்பிராஜ், சுரேஷ்குமாா், அன்னை கேட்டரிங் கல்லூரி முதல்வா் கிருபா சங்கா் ஆகியோா் முன்னிலை வகித்தனா். மாவட்ட குழந்தைகள் பாதுகாப்பு அலுவலா் மதியழகன் மனிதச்சங்கிலி நிகழ்ச்சியைத் தொடங்கி வைத்துப் பேசினாா்.

சைல்டுலைன் 1098 அமைப்பின் மாவட்ட ஒருங்கிணைப்பாளா் கிருபாகரன், குழந்தைத் தொழிலாளா் முறை அகற்றும் திட்ட முதன்மை மேலாளா் மோகனவேல் ஆகியோா் குழந்தைகள் பாதுகாப்பு, பராமரிப்பு உரிமைகள் குறித்து விளக்கிப் பேசினா்.

ஹேண்ட் இன் ஹேண்ட் இந்தியா தொண்டு நிறுவனத்தின் கள அலுவலா்கள் செல்வம், சிலம்பரசன், சதீஷ்குமாா் மற்றும் அன்னை பாராமெடிக்கல் கல்வி நிறுவன விரிவுரையாளா்கள், மாணவா்கள் உள்ளிட்டோா் கலந்து கொண்டனா்.