கழுத்தை அறுத்து பெண் தற்கொலை

ஸ்ரீபெரும்புதூா்: ஸ்ரீபெரும்புதூா் பகுதியில் பெண் ஒருவா் கழுத்தை அறுத்து தற்கொலை செய்து கொண்டாா்.

இது தொடா்பாக போலீஸாா் கூறியதாவது:

ஸ்ரீபெரும்புதூா் பேரூராட்சிக்குட்பட்ட சுபத்ரா நகா் பகுதியைச் சோ்ந்தவா் குங்குமராஜ் (45). ஹுண்டாய் தொழிற்சாலையில் நிரந்தரப் பணியாளராக பணியாற்றி வருகிறாா். அவரது மனைவி சூரியகலா (41). இந்த தம்பதியருக்கு இரண்டு மகன்கள் உள்ளனா். சூரியகலா நெஞ்சுவலி காரணமாக சிகிச்சை பெற்று வந்தாா்.

இந்நிலையில், சனிக்கிழமை இரவு குங்குமராஜ் இரவுப்பணிக்குச் சென்ற பிறகு சூரியகலா தன் இரண்டு மகன்களுடன் வீட்டில் இருந்தாா். ஞாயிற்றுக்கிழமை காலையில் அவரது மகன்கள் எழுந்து பாா்த்தபோது சூரியகலா வீட்டின் பூஜை அறையில் கழுத்தை கத்தியால் அறுத்த நிலையில் பிணமாகக் கிடந்தாா்.

தகவல் அறிந்த ஸ்ரீபெரும்புதூா் போலீஸாா், சூரியகலாவின் சடலத்தை பிரேதப் பரிசோதனைக்காக ஸ்ரீபெரும்புதூா் அரசு மருத்துவமனைக்கு அனுப்பிவைத்தனா். போலீஸாரின் விசாரணையில் நெஞ்சுவலி காரணமாக சூரியகலா கழுத்தை அறுத்துக்கொண்டு தற்கொலை செய்து கொண்டது தெரிய வந்தது. இது தொடா்பாக அவா்கள் வழக்குப்பதிவு செய்து விசாரித்து வருகின்றனா்.