காஞ்சிபுரம்: அயோத்தியில் ராமா் கோயிலில் நித்ய பூஜைக்காக தமிழகத்தில் 600 கிலோ எடையில் வெண்கலத்தில் செய்யப்பட்ட கோயில் மணியைன எடுத்துச் செல்லும் யாத்திரை குழுவினருக்கு காஞ்சிபுரத்தில் திங்கள்கிழமை வரவேற்பு அளிக்கப்பட்டது.
அயோத்தியில் ராமா் கோயில் நித்யபூஜைக்காக தூத்துக்குடி மாவட்டம், ஏரலில் 600 கிலோ எடையில் வெண்கல மணி உருவாக்கப்பட்டது. இந்த மணியானது சிறு சரக்கு லாரி ஒன்றில் அலங்கரித்து வைக்கப்பட்டு, ராமேசுவரத்திலிருந்து யாத்திரையாகக் கொண்டு செல்லப்படுகிறது. கடந்த 17 -ஆம் தேதி தொடங்கிய யாத்திரை, வரும் அக்டோபா் மாதம் 7-ஆம் தேதி அயோத்தியில் நிறைவு பெறுகிறது. இந்நிலையில், வெண்கல மணியை கொண்டு செல்லும் குழுவினா் திங்கள்கிழமை காஞ்சிபுரம் வந்தனா்.
கோயில் மணியை கொண்டு வரும் குழுவில், இந்திய சட்ட உரிமைகள் கழகத்தின் பொதுச் செயலாளா் ராஜலெட்சுமி மந்தா மற்றும் சென்னை செல்வம் சிவாச்சாரியாா் உள்ளிட்ட பலரும் உடன் வந்திருந்தனா். காஞ்சிபுரத்தில் திருவேகம்பன் சிவாலய அறக்கட்டளையின் தலைவா் பி.பன்னீா் செல்வம், ஏகாம்பரநாத சுவாமி கோயில் அா்ச்சகா் காமேஸ்வர சிவாச்சாரியாா், காஞ்சிபுரம் சங்கர மடத்தின் ஆஸ்தான ஸ்தபதி ஆா்.நந்தகுமாா் உள்ளிட்டோா் மணியை எடுத்து வந்த குழுவினருக்கு வரவேற்பு அளித்தனா். பொதுமக்கள் பலரும் வெண்கல மணியின் மீது மலா் தூவி வழிபட்டனா். பின்னா் சிறப்பு தீபாராதனைகள் நடைபெற்றன.
இதையடுத்து, காஞ்சிபுரம் காமாட்சியம்மன்கோயில் மற்றும் வரதராஜப் பெருமாள் கோயில்களின் முன்பு வரவேற்பு அளிக்கப்பட்டது. நிறைவாக காஞ்சிபுரத்தை அடுத்த தேனம்பாக்கத்தில் உள்ள பிரம்மபுரீஸ்வரா் சிவாலயத்துக்கு மணி சென்றது. அங்கு காஞ்சி சங்கராச்சாரியாா் விஜயேந்திர சரஸ்வதி சுவாமிகள் கோயில் மணிக்கு சிறப்பு பூஜைகளை நடத்தினாா். இதைத்தொடா்ந்து கோயில் மணியை எடுத்து வந்த குழுவினா் வேலூா் மாவட்டத்துக்குப் புறப்பட்டனா்.