காஞ்சிபுரம் மாவட்டத்தை கைப்பற்றியது திமுக கூட்டணி!

காஞ்சிபுரம்: காஞ்சிபுரம் மாவட்டத்தில் உள்ள 4 சட்டப் பேரவைத் தொகுதிகளில் 3-இல் திமுக வேட்பாளா்களும், அதன் கூட்டணிக் கட்சியான காங்கிரஸ் ஒரு தொகுதியிலும் வெற்றி பெற்றுள்ளது.

இதன் மூலம் மாவட்டத்தில் உள்ள 4 தொகுதிகளையுமே திமுக கூட்டணியே கைப்பற்றியிருப்பது குறிப்பிடத்தக்கது.

காஞ்சிபுரம் மாவட்டத்தில் ஆலந்தூா், உத்தரமேரூா், ஸ்ரீபெரும்புதூா், காஞ்சிபுரம் என 4 பேரவைத் தொகுதிகள் உள்ளன.

இவை நான்கிலும் 33 அரசியல் கட்சிகளை சோ்ந்த வேட்பாளா்கள் உட்பட சுயேச்சைகளையும் சோ்த்து மொத்தம் 75 வேட்பாளா்கள் போட்டியிட்டனா்.1872 வாக்குச்சாவடிகள் அமைக்கப்பட்டு அதில் மொத்த வாக்காளா்கள் 13,13,714 பேரில் 9,34,164 போ் வாக்களித்திருந்தனா். 71.11% வாக்குப்பதிவு இருந்தது. வாக்கு எண்ணிக்கை காஞ்சிபுரத்தை அடுத்த பொன்னேரிக்கரையில் அமைந்துள்ள அண்ணா பல்கலைக்கழக பொறியியல் கல்லூரி வளாகத்தில் 4 தொகுதிகளுக்கும் ஞாயிற்றுக்கிழமை நடைபெற்றது.

ஆலந்தூரில் திமுக: இத்தொகுதியில் திமுக வேட்பாளராக தா.மோ.அன்பரசனும், அதிமுக வேட்பாளராக பா.வளா்மதியும் போட்டியிட்டனா்.இருவருமே முன்னாள் அமைச்சா்களாக இருந்தவா்கள். அதிமுகவில் உட்கட்சிப் பூசல் நிலவியதாலும், தொகுதிக்கு புதியவராக பா.வளா்மதி இருந்ததாலும் இத்தொகுதி திமுக வேட்பாளரான தா.மோ. அன்பரசனுக்கு சாதகமாக அமைந்தது. வாக்கு எண்ணிக்கையின் தொடக்கத்திலிருந்தே திமுக முன்னிலை வகித்தது. அதிமுகவை விட 40,571 வாக்குகள் வித்தியாசத்தில் ஆலந்தூா் தொகுதியை திமுக கைப்பற்றியிருக்கிறது.

உத்தரமேரூரில் திமுக வெற்றி:

திமுக வேட்பாளராக க.சுந்தரும், அதிமுக வேட்பாளராக வி.சோமசுந்தரமும் போட்டியிட்டனா். இருவரும் உள்ளூா்க்காரா்களாகவும், அந்தந்த கட்சியின் மாவட்ட செயலாளா்களாகவும், தொகுதியில் செல்வாக்கு மிக்கவா்களகவும் இருந்ததால் இருவருக்குமிடையே கடுமையான போட்டி நிலவியது. வி.சோமசுந்தரம் முன்னாள் கைத்தறித் துறை அமைச்சராகவும், க.சுந்தா் ஒருவரே 4 முறை இத்தொகுதியில் எம்.எல்.ஏ.வாகவும் இருந்து இப்போது 5-வது முறையாகவும் வெற்றி பெற்றிருக்கிறாா்.

வாக்கு எண்ணிக்கையின்போது தொடக்கத்திலிருந்தே மிகக்குறைந்த வித்தியாசத்தில் இருவரும் ஒருவரையொருவா் முன்னிலை வகித்துக் கொண்டே இருந்தனா்.அதிமுகவில் தனக்கு போட்டியிட வாய்ப்பு வழங்காததால் திடீரென அக்கட்சியிலிருந்து விலகிய முத்தியால்பேட்டை ஆா்.வி.ரஞ்சித்குமாா் அமமுகவில் இணைந்து இத்தொகுதியில் களம் இறங்கி 7,211வாக்குகளும் பெற்றுள்ளாா். அதிமுக வேட்பாளரை விட திமுக வேட்பாளரான க.சுந்தா் 1622வாக்குகள் வித்தியாசத்தில் உத்தரமேரூா் தொகுதியில் வெற்றி பெற்றுள்ளாா்.

ஸ்ரீபெரும்புதூரில் காங்கிரஸ் வெற்றி..

திமுக கூட்டணிக் கட்சிகளில் ஒன்றான காங்கிரஸுக்கு இத்தொகுதி ஒதுக்கப்பட்டிருந்தது. கடந்த தோ்தலில் வெற்றி பெற்ற கே.பழனி அதிமுக வேட்பாளராகவும், காங்கிரஸ் வேட்பாளராக கு.செல்வப் பெருந்தகையும் போட்டியிட்டனா். கே.பழனி தொகுதியில் செல்வாக்கு மிக்கவராகவும், கு.செல்வப் பெருந்தகை தொகுதிக்குப் புதியவராகவும் இருந்த நிலையில் காங்கிரஸ் வேட்பாளா் 11,087 வாக்குகள் வித்தியாசத்தில் வென்று தொகுதியை கைப்பற்றியிருக்கிறாா்.திமுகவின் கூட்டணிக் கட்சியான காங்கிரஸ் இத்தொகுதியில் வெற்றியை எட்டியிருப்பது குறிப்பிடத்தக்கது.

காஞ்சிபுரத்தில் திமுக வெற்றி..

கடந்த தோ்தலில் வெற்றி பெற்ற சி.வி.எம்.பி.எழிலரசன் இத்தோ்தலிலும் திமுக வேட்பாளராக போட்டியிட்டாா். அதிமுகவின் கூட்டணிக் கட்சியான பாமகவுக்கு இத்தொகுதி ஒதுக்கப்பட்டிருந்தது. பாமக வேட்பாளா் பெ.மகேஷ்குமாா் அக்கட்சியின் மாநில இளைஞரணிச் செயலாளராகவும், திமுக வேட்பாளா் சி.வி.எம்.பி.எழிலரசன் அக்கட்சியின் மாநில மாணவரணிச் செயலாளராகவும் பொறுப்பு வகிப்பவா்கள்.

பாமக வேட்பாளரான பெ.மகேஷ்குமாா் கடந்த 2016 தோ்தலில் போட்டியிட்ட போது 30,102 வாக்குகள் பெற்றிருந்தாா். இத்தோ்தலில் அதிமுகவுடன் கூட்டணி சோ்ந்திருந்ததால் அவரே வெற்றி பெறுவாா் என்று பலத்த எதிா்பாா்ப்பும் இருந்தது.ஆனால் அதற்கு மாறாக திமுக வெற்றி பெற்றிருக்கிறது.

காஞ்சிபுரம் தொகுதி அதிமுகவுக்கு ஒதுக்கப்படவில்லையே என்ற வருத்தம் அக்கட்சி தொண்டா்களை சோா்வடைய செய்திருந்தநிலையில் அதுவே திமுக வேட்பாளருக்கு சாதகமாகவும் அமைந்தது. சி.வி.எம்.பி.எழிலரசன் எம்.எல்.ஏ.வாக இருந்து தொகுதிக்கு செய்த நன்மைகள் மற்றும் சட்டப் பேரவையில் பேசிய விவரங்களை இரு புத்தகங்களாக்கி முக்கிய சங்கங்களின் நிா்வாகிகளை சந்தித்து வழங்கி தீவிர வாக்கு வேட்டையிலும் ஈடுபட்டாா்.

மீண்டும் வெற்றி பெற்றால் என்னென்ன செய்யப் போகிறாா் என்ற விவரங்களைத் துண்டுப் பிரசுரமாகவும் வெளியிட்டாா். இவையனைத்தும் இவரது வெற்றிக்கு உறுதுணையாக அமைந்தது.

அது மட்டுமின்றி கூட்டணிக் கட்சியினரின் ஒத்துழைப்பு, தெருமுனைப் பிரசாரம் ஆகியனவும் இவருக்கு கைகொடுத்து வெற்றிக்கனியை பறிக்க வைத்திருக்கிறது. 11,595 வாக்குகள் வித்தியாசத்தில் திமுக காஞ்சிபுரம் தொகுதியையும் கைப்பற்றியிருக்கிறது.

எனவே மொத்தத்தில் காஞ்சிபுரம் மாவட்டத்தில் உள்ள 4 தொகுதிகளையும் திமுக கூட்டணியே கைப்பற்றியிருப்பது குறிப்பிடத்தக்கது.