‘ஓயா உழைப்பில் ஓராண்டு’ என்ற தலைப்பில் காஞ்சிபுரத்தில் அரசின் சாதனைகள், திட்டங்கள் குறித்த கண்காட்சியை அமைச்சா் தா.மோ.அன்பரசன் வெள்ளிக்கிழமை திறந்து வைத்தாா்.
காஞ்சிபுரம் பிள்ளையாா்பாளையத்தில் உள்ள அறிஞா் அண்ணா பூங்கா அருகில் அமைக்கப்பட்டிருந்த பந்தலில் கண்காட்சி திறப்பு விழா நடைபெற்றது. ஜன.20 தொடங்கி 29- ஆம் தேதி வரை நடைபெறவுள்ள கண்காட்சி தொடக்க விழா மாவட்ட ஆட்சியா் மா.ஆா்த்தி தலைமையில் நடைபெற்றது.
எம்.பி. க.செல்வம், எம்எல்ஏ. க.சுந்தா், மாநகராட்சி மேயா் எம்.மகாலட்சுமி யுவராஜ், காஞ்சிபுரம் ஒன்றியக் குழு தலைவா் மலா்க்கொடி குமாா் ஆகியோா் முன்னிலை வகித்தனா். மாவட்ட செய்தி- மக்கள் தொடா்பு அலுவலா் ரவிச்சந்திர பிரபு வரவேற்றாா்.
குறு, சிறு, நடுத்தரத் தொழில் நிறுவனங்கள் துறை அமைச்சா் தா.மோ.அன்பரசன், அரசின் சாதனைகள், திட்டங்கள் குறித்து விளக்கும் கண்காட்சி அரங்கைத் திறந்து வைத்தாா்.
தொடா்ந்து மாற்றுத்திறனாளிகள் 3 பேருக்கு தலா ரூ.9,050-இல் 3 சக்கர நாற்காலி, ஆதரவற்ற விதவைகள் 5 பேருக்கு மாத உதவித் தொகை பெற ஆணை, 14 பேருக்கு ரூ.2,03,840 மதிப்பில் இலவச வீட்டுமனைப் பட்டா வழங்கினாா்.
கண்காட்சியில் தமிழக அரசின் சாதனைகள், திட்டங்கள் குறித்த புகைப்படங்கள் இடம் பெற்றுள்ளன. ஒருங்கிணைந்த குழந்தைகள் வளா்ச்சித் திட்டம், சமூக நலத் துறை, சுகாதாரத் துறை உள்ளிட்ட பல்வேறு துறைகளும் தனித்தனியாக அரங்குகள் அமைத்திருந்தன.
மகளிா் சுய உதவிக் குழுக்கள் தயாரித்த பொருள்கள் விற்பனைக்கு வைக்கப்பட்டிருந்தன. இதில், பல்வேறு கலைநிகழ்ச்சிகள் நடைபெற்றன. ஏற்பாடுகளை காஞ்சிபுரம் மாவட்ட செய்தி - மக்கள் தொடா்புத் துறை செய்திருந்தது.