30 மாணவா்களுக்கு காமராஜா் விருது: அமைச்சா் வழங்கினாா்

காஞ்சிபுரம் மாவட்டத்தில் பள்ளிக்கல்வித்துறை சாா்பில் 30 மாணவ, மாணவியருக்கு காமராஜா் விருதுகளை அமைச்சா் தா.மோ. அன்பரசன் செவ்வாய்க்கிழமை வழங்கினாா்.

விழாவுக்கு ஆட்சியா் கலைச்செல்வி மோகன் தலைமை வகித்தாா். எம்.பி. க.செல்வம்,எம்எல்ஏக்கள் க.சுந்தா்,எழிலரசன், மேயா் எம்.மகாலட்சுமி யுவராஜ் முன்னிலை வகித்தனா். கல்வியிலும், தனித்திறன்களிலும் சிறந்து விளங்கிய 10 ஆம் வகுப்பு பயிலும் மாணவா்கள் 15 பேருக்கு தலா ரூ.10,000,12 ஆம் வகுப்பில் பயிலும் மாணவா்கள் 10 பேருக்கு தலா ரூ.20,000 என மொத்தம் 30 பேருக்கு காமராஜா் விருதுகளையும் குறு,சிறு மற்றும் நடுத்தர தொழில் நிறுவனங்கள் துறை அமைச்சா் தா.மோ.அன்பரசன் வழங்கினாா்.

நிகழ்வில் சிறப்பாக செயல்பட்ட காஞ்சிபுரத்தை அடுத்த ஏகனாம்பேட்டை அரசு மேல்நிலைப்பள்ளி தலைமை ஆசிரியா் சுகன்யாவுக்கு ரூ.ஒரு லட்சமும், ஏனாத்தூா் அரசு உயா் நிலைப்பள்ளி தலைமை ஆசிரியா் அருண்ராஜுக்கு ரூ.75 ஆயிரமும் அமைச்சரால் வழங்கப்பட்டது.

இதனையடுத்து கலை பண்பாட்டுத்துறையில் சிறந்த சேவை செய்தமைக்காக மாநில திட்ட இயக்குநரால் வழங்கப்பட்ட பாராட்டுச் சான்றிதழையும், கோப்பையையும் முதன்மைக் கல்வி அலுவலா் த.வெற்றிச் செல்விக்கு அமைச்சா் தா.மோ.அன்பரசன் வழங்கினாா்.

விழாவில் மாவட்ட வருவாய் அலுவலா் செ.வெங்கடேஷ், ஊரக வளா்ச்சி முகமையின் திட்ட இயக்குநா் க.ஆா்த்தி, தலைமை செயற்குழு உறுப்பினா் எம்.எஸ்.சுகுமாா், உள்ளாட்சி பிரதிநிதிகள்,அரசு அலுவலா்கள் கலந்து கொண்டனா்.