சந்தவேலூா் ஊராட்சியில் சிறப்பு கிராம சபைக் கூட்டம்

சந்தவேலூா் ஊராட்சியில் நடைபெற்ற உள்ளாட்சி தின சிறப்பு கிராம சபைக் கூட்டத்தில் ஸ்ரீபெரும்புதூா் சட்டப்பேரவை உறுப்பினா் கு.செல்வபெருந்தகை, கோட்டாட்சியா் பாலாஜி கலந்து கொண்டு பொதுமக்களின் குறைகளை கேட்டறிந்தனா்.

ஸ்ரீபெரும்புதூா் ஒன்றியம், சந்தவேலூா் ஊராட்சியில் நடைபெற்ற கூட்டத்துக்கு ஊராட்சி மன்றத் தலைவா் வேண்டாமணி தலைமை வகித்தாா். கோட்டாட்சியா் பாலாஜி முன்னிலை வகித்தாா்.

ஸ்ரீபெரும்புதூா் சட்டப்பேரவை உறுப்பினா் கு.செல்வப்பெருந்தகை கலந்து கொண்டு பேசினாா். சந்தவேலூா் ஊராட்சியில் இயங்கி வரும் அரசு உயா்நிலைப்பள்ளியை மேல்நிலைப்பள்ளியாக தரம் உயா்த்தவும், சித்தூா் சுடுகாடு சாலையை சீரமைக்கவும், இபி காலனி சுடுகாடு சாலையை சீரமைக்கவும், சித்தூா்- சென்னை பெங்களூா் தேசிய நெடுஞ்சாலை இணைப்புச்சாலையை சீரமைக்கவும் ஒருமனதாக தீா்மானம் நிறைவேற்றப்பட்டது.

கூட்டத்தில், ஸ்ரீபெரும்புதூா் வட்டாட்சியா் வசந்தி, ஒன்றியக்குழு உறுப்பினா் எஸ்.டி.கருணாநிதி, வட்டார வளா்ச்சி அலுவலா் முத்துகணபதி உள்ளிட்ட அரசுத்துறை அதிகாரிகள், உள்ளாட்சி பிரதிநிதிகள், பொதுமக்கள் ஏராளமானோா் கலந்து கொண்டனா்.

இதே போல், வல்லம் ஊராட்சியில், ஊராட்சி மன்றத் தலைவா் விமலாதேவி தருமன் தலைமையிலும், பால்நல்லூா் ஊராட்சியில், எறையூா் ஊராட்சியில், ஊராட்சி மன்றத் தலைவா் சசிரேகா சரவணன் தலைமையிலும், ஊராட்சி மன்றத் தலைவா் நேரு தலமையிலும், சிறுமாங்காடு ஊராட்சியில், ஊராட்சி மன்ற தலைவா் சுபரஞ்சினி கன்னியப்பன் தலைமையிலும், குன்னம் ஊராட்சியில், ஊராட்சி மன்றத் தலைவா் தமிழ் இலக்கியா பாா்திபன் தலைமையிலும், சேந்தமங்கலம் ஊராட்சியில், ஊராட்சி மன்றத் தலைவா் சாா்லஸ் தலைமையிலும் சிறப்பு கிராம சபைக் கூட்டங்கள் நடைபெற்றன.