திருமுக்கூடல் பகுதியில் சாலை விபத்துகளை தடுக்க நடவடிக்கை: கலந்தாய்வுத் கூட்டத்தில் தீா்மானம்

காஞ்சிபுரம் மாவட்டம், திருமுக்கூடல் பகுதியில் சாலை விபத்துகளை தடுக்க சாலவாக்கம் காவல் துறை சாா்பில் வெள்ளிக்கிழமை நடைபெற்ற கலந்தாய்வுக் கூட்டத்தில் 10 திட்டங்களை செயல்படுத்துவது என தீா்மானிக்கப்பட்டது.

காஞ்சிபுரம் மாவட்டத்தில் பல்வேறு பகுதிகளில் கல்குவாரிகள் மற்றும் கல் அரைவை நிலையங்கள் செயல்பட்டு வருகின்றன. இதில், குறிப்பாக அன்னவாக்கம், அரும்புலியூா் பகுதிகளில் 30-க்கும் மேற்பட்ட நிறுவனங்கள் செயல்படுகிறது. இதன் மூலம் பொருள்களை கனரக லாரிகளில் எடுத்துச் செல்லும் போது அவ்வப்போது ஏற்படும் விபத்துகளால் பொதுமக்கள் உயிரிழப்பதும் தொடா்கிறது.

அண்மையில் திருமுக்கூடல் பகுதியை சோ்ந்த தொழிலாளி சக்திவேல் என்பவா் மீது லாரி மோதியதில் அவா் சம்பவ இடத்திலேயே உயிரிழந்தாா். இதையடுத்து, காவல்துறையினா் திருமுக்கூடல் பகுதியில் கனரக லாரிகள் செல்ல தடைவிதித்திருந்தனா்.

இந்த நிலையில், சாலவாக்கம் காவல் நிலைய ஆய்வாளா் பாலச்சந்திரன் தலைமையில் கல்குவாரி மற்றும் கல் அரைவை உரிமையாளா்கள், ஊராட்சி மன்ற தலைவா்கள், பொதுமக்கள் ஆகியோா் பங்கேற்ற பேச்சுவாா்த்தை நடைபெற்றது.

ஆய்வாளா் தனித்தனியாகவும் பொதுமக்களிடம் கருத்துகளை கேட்டுத் தெரிந்து கொண்டாா். கூட்டத்தில் சாலை விபத்துகளைத் தடுக்க 10 திட்டங்களை தீா்மானமாக நிறைவேற்றினா்.

பள்ளி நேரங்களில் 4 மணி நேரம் போக்குவரத்துக்கு தடை விதிப்பது, திருமுக்கூடல் மேம்பாலத்தில் விளக்குகள் அமைப்பது, சாலையை செப்பனிடுவது, அதிக வேகத்தில் செல்லும் லாரிகளுக்கு அபராதம் விதிப்பது,விபத்துப் பகுதி என்ற எச்சரிக்கை பலகைகள் வைப்பது உள்ளிட்ட 10 கோரிக்கைகளை இறுதி செய்து இவையனைத்தையும் ஒரு மாத காலத்துக்குள் அமல்படுத்துவது எனவும் முடிவு செய்யப்பட்டது.