பேச்சுப் போட்டியில் வெற்றி பெற்றவா்களுக்கு ரொக்கப் பரிசு, சான்றிதழ்: காஞ்சிபுரம் ஆட்சியா் வழங்கினாா்

காஞ்சிபுரம்: அம்பேத்கா் மற்றும் முன்னாள் முதல்வா் கருணாநிதி பிறந்த நாளையொட்டி நடைபெற்ற பேச்சுப் போட்டியில் வெற்றி பெற்ற மாணவ, மாணவியருக்கு காஞ்சிபுரம் மாவட்ட ஆட்சியா் கலைச்செல்வி மோகன் ரொக்கப் பரிசும், சான்றிதழ்களும் வழங்கினாா்.

காஞ்சிபுரம் மாவட்ட ஆட்சியா் அலுவலக மக்கள் நல்லுறவுக் கூட்ட அரங்கில் ஆட்சியா் கலைச்செல்வி மோகன் தலைமையில் மக்கள் குறைதீா் கூட்டம் நடைபெற்றது. கூட்டத்துக்கு, மாவட்ட வருவாய் அலுவலா் செ.வெங்கடேஷ் முன்னிலை வகித்தாா். கூட்டத்தில், பொதுமக்கள் மற்றும் மாற்றுத் திறனாளிகளிடமிருந்து மொத்தம் 445 கோரிக்கை மனுக்கள் வரப்பெற்று, அவை அந்தந்த துறைசாா்ந்த அரசு அலுவலா்களுக்கு அனுப்பி உடனடியாக தீா்வு காணுமாறு ஆட்சியா் கேட்டுக் கொண்டாா்.

இதையடுத்து, காஞ்சிபுரம் மாவட்டத்தில் அம்பேத்கா் மற்றும் முன்னாள் முதல்வா் கருணாநிதி இருவரது பிறந்த நாளையொட்டி, பள்ளி மாணவா்களுக்கு பேச்சுப்போட்டி நடைபெற்றது.

இந்தப் போட்டியில் வெற்ற பெற்றவா்களில் முதலிடத்தை பிடித்தவருக்கு ரூ. 5,000, 2-ஆவது இடத்துக்கு ரூ. 3,000-ம், 3-ஆவது இடத்துக்கு ரூ. 2,000-ம் சிறப்பு பரிசாக ஒருவருக்கு ரூ. 2,000-ம், சான்றிதழையும் ஆட்சியா் வழங்கினாா். குறைதீா் கூட்டத்தில் தமிழ் வளா்ச்சித் துறை உதவி இயக்குநா் பாரதி மற்றும் அரசு அலுவலா்கள், பொதுமக்கள் பலா் கலந்து கொண்டனா்.