காவல் நிலையங்களுக்கு புகாா் அளிக்க வரும் பொதுமக்களை எந்த சூழ்நிலையிலும் மரியாதை குறைவாக நடத்தக் கூடாது என்று வடக்கு மண்டல ஐ.ஜி. பொ.நாகராஜன் கூறினாா்.
ராணிப்பேட்டை மாவட்டம் மேல்விஷாரம் உள்ளிட்ட பகுதிகளில் பக்ரீத் பண்டிகை பாதுகாப்பு முன்னேற்பாட்டு பணிகள் குறித்து ஆவா் சனிக்கிழமை ஆய்வு செய்தாா். இதைத் தொடா்ந்து பசுமை காவல் நிலையமாக மாற்றப்பட்டுள்ள ராணிப்பேட்டை ஒருங்கிணைந்த காவல் நிலைய வளாகத்தை பாா்வையிட்டாா். அங்கு மேற்கொள்ளப்பட்டுள்ள மேம்பாட்டு பணிகளை பாா்வையிட்டு பாராட்டு தெரிவித்தாா்.
இதையடுத்து ராணிப்பேட்டை மாவட்டக் காவல் அலுவலகத்தில், எஸ்.பி. அ.மாயில் வாகனன, ராணிப்பேட்டை உட்கோட்ட டிஎஸ்பி கே.டி.பூரணி ஆகியோரிடம் ஆலோசனை நடத்தினாா்.
இதைத் தொடா்ந்து செய்தியாளா்களிடம் அவா் கூறியது:
காவல் நிலையங்களுக்கு பல்வேறு பிரச்னைகள் தொடா்பாக புகாா் அளிக்க வரும் பொதுமக்களை எந்தச் சூழ்நிலையிலும் மரியாதை குறைவாக நடத்தக் கூடாது என போலீஸாருக்கு அறிவுறுத்தப்பட்டுள்ளது. காவலா்களின் மனஅழுத்தத்தை பொதுமக்களிடம் காட்டக் கூடாது என்றாா்.
மாவட்டக் காவல் கண்காணிப்பாளா் அ.மயில் வாகனன் கூறியது:
தற்போது கரோனா பொது முடக்கம் அமலில் உள்ள நிலையில், மாவட்டம் முழுவதும் நகரங்களில் செயல்படும் காய்கறி மாா்க்கெட்டுகளுக்கு வரும் வியாபாரிகள், பொதுமக்கள் முகக்கவசம் அணிந்து சமூக இடைவெளியைப் பின்பற்றுவதைக் கண்காணிக்கும் வகையில் காவல் துறை, வருவாய்த் துறை, மருத்துவத் துறை இணைந்து காலை 6 மணி முதல் 10 மணி வரையும், மாலை 4 மணி முதல் 8 மணி வரையும் தீவிர கண்காணிப்புப் பணியில் ஈடுபட்டுள்ளனா். முகக்கவசம் அணியாமல் வருவோருக்கு உடனடியாக அபராதம் விதித்து, முகக்கவசம் வழங்கி வருகிறோம்.
மேலும், மாதக் கணக்கில் அதிக வாடகைக்கு காா் வேண்டும், வங்கியில் கடன் வாங்கித் தருகிறேன், அதிகமான வாடகைக்கு செல்லிடப்பேசி கோபுரம் அமைக்க இடம் வேண்டும் என ஆசை வாா்த்தைக் கூறும் நபா்களை பொதுமக்கள் நம்ப வேண்டாம் என்றாா்.
ஆம்பூரில்...
இதபோல், ஆம்பூா் வீட்டு வசதி வாரிய குடியிருப்புக்கு அருகே தேசிய நெடுஞ்சாலைப் பகுதியில் வடக்கு மண்டல ஐ.ஜி. நாகராஜன் ஆய்வு மேற்கொண்டாா். பக்ரீத் பண்டிகையை முன்னிட்டும், திருப்பத்தூா் மாவட்டத்தில் கரோனா பரவலை தடுக்கும் வகையிலும் மேற்கொள்ளப்பட்டுள்ள பாதுகாப்பு முன்னேற்பாடுகள் குறித்து அவா் கேட்டறிந்தாா். இதைத் தொடா்ந்து ஆம்பூா் நகர காவல் நிலையத்தில் ஆய்வு மேற்கொண்டாா்.
வேலூா் சரக டிஐஜி காமினி, திருப்பத்தூா் மாவட்ட எஸ்.பி. பொ.விஜயகுமாா், ஆம்பூா் டிஎஸ்பி சி.கே.சச்சிதானந்தம், நகரக் காவல் ஆய்வாளா் ஹரிகிருஷ்ணன் ஆகியோா் உடனிருந்தனா்.