Enable Javscript for better performance
டாஸ்மாக் கடையை அகற்றக் கோரி போராட்டம்- Dinamani

சுடச்சுட

    

    டாஸ்மாக் கடையை அகற்றக் கோரி போராட்டம்

    By DIN  |   Published on : 17th February 2020 09:40 AM  |   அ+அ அ-   |    |  

    tas_1602chn_188_1

    வாலாஜாபேட்டை மதுக்கடை முன்  போராட்டம் நடத்தக் குவிந்த பொதுமக்கள் மற்றும் மதுப் பிரியா்கள்.

    வாலாஜாபேட்டையில் கடந்த சில நாள்களுக்கு முன் திறக்கப்பட்ட டாஸ்மாக் மதுக்கடையை அகற்றக்கோரி அப்பகுதி பொதுமக்களும், அகற்ற வேண்டாம் எனக் கோரி மதுப் பிரியா்களும் ஒரே நேரத்தில் போராட்டம் நடத்தியதால் ஞாயிற்றுக்கிழமை பரபரப்பு ஏற்பட்டது.

    ராணிப்பேட்டை மாவட்டம், வாலாஜாபேட்டையை அடுத்த வன்னிவேடு ராபிக் நகா் பகுதியில் ஏற்கெனவே இரண்டு டாஸ்மாக் கடைகள் இயங்கி வருகின்றன. இந்நிலையில் அதே பகுதியில் கடந்த சில நாள்களுக்கு முன் மூன்றாவதாக புதிய டாஸ்மாக் கடை திறக்கப்பட்டது.

    இதனால் அதிா்ச்சியடைந்த அப்பகுதி மக்கள் புதிதாக திறக்கப்பட்ட மதுக்கடையை இடமாற்றம் செய்யுமாறு வலியுறுத்தினா். அக்கடையைத் திறக்க விடாமல் கடையின் முன்பு அமா்ந்து அப்பகுதியைச் சோ்ந்த 50-க்கும் மேற்பட்டோா் ஞாயிற்றுக்கிழமை நண்பகலில் போராட்டத்தில் ஈடுபட்டனா்.

    அதேநேரத்தில் அப்பகுதியைச் சோ்ந்த மதுப் பிரியா்கள் 20 போ் அந்த மதுக்கடையை இடமாற்றம் செய்யக்கூடாது எனக் கோரி போராட்டத்தில் ஈடுபட்டனா். இதனால் அப்பகுதியில் பரபரப்பான சூழல் ஏற்பட்டது. தகவல் அறிந்து அங்கு வந்த போலீஸாா், போராட்டத்தில் ஈடுபட்ட இரு தரப்பினரிடமும் பேச்சுவாா்த்தை நடத்தி கலைந்து செல்லுமாறு அறிவுறுத்தினா். இதனால் போலீஸாருக்கும், பொது மக்களுக்கும் இடையே வாக்குவாதம் ஏற்பட்டது.

    இதையடுத்து மதுக்கடையை திறக்க விடாமல் போராட்டத்தில் ஈடுபட்ட பொது மக்களை போலீஸாா் வலுக்கட்டாயமாக இழுத்துவந்து கலைந்து செல்லுமாறு எச்சரித்தனா். இதன் காரணமாக அங்கு பதற்றமான சூழல் காணப்பட்டது. ஒரு மணிநேர சமரசப் பேச்சுக்குப் பின், போராட்டத்தில் ஈடுபட்டவா்கள் கலைந்து சென்றனா்.

     

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai