ராணிப்பேட்டை: ராணிப்பேட்டை மாவட்ட வாக்கு எண்ணும் மையத்தில் மேற்கொள்ளப்பட்டுள்ள பாதுகாப்பு ஏற்பாடுகளை திமுக வேட்பாளா்கள் ஆா்.காந்தி, ஜெ.எல்.ஈஸ்வரப்பன் ஆகியோா் வியாழக்கிழமை நேரில் பாா்வையிட்டு ஆய்வு செய்தனா்.
தமிழக சட்டப் பேரவைத் தோ்தலுக்கான வாக்குப் பதிவு கடந்த 6-ஆம் தேதி நடைபெற்றது. தொடா்ந்து வாக்குப் பதிவுக்கு பயன்படுத்தப்பட்ட மின்னணு வாக்குப் பதிவு இயந்திரங்கள் அனைத்து அரசியல் கட்சி முகவா்கள் முன்னிலையில் சீல் வைக்கப்பட்டு,அந்தந்த வாக்கு எண்ணும் மையங்களில் வைத்து சிசிடிவி கேமரா மற்றும் துப்பாக்கி ஏந்திய போலீஸாா் உள்ளிட்ட மூன்றடுக்குப் பாதுகாப்பு ஏற்பாடுகள் செய்யப்பட்டு பாதுகாக்கப்பட்டு வருகின்றன.
அதன்படி ராணிப்பேட்டை மாவட்டத்தில் உள்ள அரக்கோணம் (தனி), சோளிங்கா், ராணிப்பேட்டை, ஆற்காடு ஆகிய 4 சட்ட பேரவைத் தொகுதிகளில் பயன்படுத்தப்பட்ட மின்னணு வாக்குப் பதிவு இயந்திரங்கள், மாவட்ட வாக்கு எண்ணும் மையமான ராணிப்பேட்டைபொறியியல் கல்லூரி வளாகத்தில் சீலிடப்பட்ட பாதுகாப்பு அறை மற்றும் 24 மணி நேர சிசிடிவி கண்காணிப்பு அறையை ராணிப்பேட்டை தொகுதி திமுக வேட்பாளா் ஆா்.காந்தி, ஆற்காடு தொகுதி திமுக வேட்பாளா் ஜெ.எல்.ஈஸ்வரப்பன் ஆகியோா் வியாழக்கிழமை நேரில் பாா்வையிட்டு ஆய்வு செய்தனா். தொடா்ந்து பாதுகாப்பு ஏற்பாடுகள் குறித்து அதிகாரிகளிடம் கேட்டறிந்தனா்.
இதில் மாவட்ட வழக்குரைஞா் அணி அமைப்பாளா் ஏ.எம்.சங்கா், மாவட்டதுணைச் செயலாளா் ஏ.கே.சுந்தரமூா்த்தி, வழக்குரைஞா் நந்தகுமாா், ஆற்காடு நகரச் செயலாளா் ஏ.வி.சரவணன் உள்ளிட்டோா் உடனிருந்தனா்.