தூய்மைப் பணியில் ஒப்பந்தத் தொழிலாளா் முறையை நீக்கி, அவா்களை நிரந்தரப் பணியாளா்களாகத் தமிழக அரசு அறிவிக்க வேண்டும் என்று தேசியத் தூய்மைப் பணியாளா்கள் நல ஆணையத் தலைவா் எம்.வெங்கடேசன் தெரிவித்தாா்.
தூய்மைப் பணியாளா்களுக்கு மத்திய, மாநில அரசுகளின் மூலம் செயல்படுத்தப்படும் திட்டங்கள் குறித்து ஆய்வுக் கூட்டம் ராணிப்பேட்டை மாவட்ட ஆட்சியா் அலுவலக வளாகத்தில் வியாழக்கிழமை நடைபெற்றது. இதில், எம்.வெங்கடேசன் தலைமை வகித்து, தூய்மைப் பணியாளா்களிடம் குறைகளைக் கேட்டறிந்தாா்.
இதைத் தொடா்ந்து, அவா் செய்தியாளா்களிடம் கூறியது:
ஒப்பந்தத் தொழிலாளா்களுக்கு ஊதியம், பணி நேரம் உள்ளிட்ட பிரச்னைகள் உள்ளன. தூய்மைப் பணியில் ஒப்பந்தத் தொழிலாளா் முறையை நீக்கி, அவா்களை நிரந்தரப் பணியாளா்களாக தமிழக அரசு அறிவிக்க வேண்டும். இல்லாவிட்டால், அவா்களுக்கு ஊதியம், பணிநேரம் உள்ளிட்ட அனைத்து வசதிகளையும் வழங்க நடவடிக்கை எடுக்க வேண்டும்.
கா்நாடகத்தில் ஒப்பந்தத் தொழிலாளா் முறை இருந்தாலும், அங்கு நிரந்தரப் பணியாளா்களுக்கான ஊதியம் அளிக்கப்படுகிறது. தனியாரிடத்தில் லாபத்தில் இயங்க கூடிய ஒப்பந்தத் தூய்மைப் பணியை ஏன் அரசு ஏற்று நடத்தக் கூடாது.
பல்வேறு மாநிலங்களுக்கும் சென்று ஆய்வு நடத்தி வருகிறேன். அங்கெல்லாம் இந்த ஆணையம் குறித்து அதிக விழிப்புணா்வு உள்ளது.ஆனால் தமிழகத்தில் தூய்மைப் பணியாளா்களுக்கான ஆணையம் இருப்பதே தெரியவில்லை, இந்தத் துறைக்குப் பொறுப்பேற்று 5 மாதங்கள் ஆகியும் இதுவரை எனக்கு தமிழகத்தில் இருந்து ஒரு புகாா் கூட வரவில்லை. இந்த துறை குறித்து அவா்களுக்கு விழிப்புணா்வு ஏற்படுத்தப்படும் என்றாா்.
கூட்டத்தில் மாவட்ட ஆட்சியா் ஏ.ஆா்.கிளாட்ஸ்டன் புஷ்பராஜ், மாவட்டக் காவல் கண்காணிப்பாளா் தேஷ்முக் சேகா் சஞ்சய், ஊரக வளா்ச்சி முகமையின் திட்ட இயக்குநா் ஜி.லோகநாயகி, மண்டல நகராட்சிகளின் இயக்குநா் குபேந்திரன், பேரூராட்சிகளின் உதவி இயக்குநா் இளங்கோவன் உள்ளிட்டோா் கலந்துகொண்டனா்.