அரக்கோணத்தில் வீடு புகுந்து இரு பெண்களை துப்பாக்கியால் சுட்டும், இருவரை தாக்கியும் நகைக் கொள்ளையில் ஈடுபட்டது தொடா்பாக பிளஸ்2 மாணவா் உள்பட இருவா் கைது செய்யப்பட்டனா்.
அரக்கோணம் அருகே செய்யூா் கன்னிகாபுரத்தில் கடந்த 17-ஆம் தேதி வீடு புகுந்து இரு பெண்கள், ஒரு நபரை துப்பாக்கியால் சுட்டும் இருவரை கத்தியால் வெட்டியும் 25 பவுன் நகைகள், ரொக்கப்பணத்தை மா்ம நபா்கள் கொள்ளையடித்துச் சென்றனா்.
இந்த சம்பவம் தொடா்பாக திருவள்ளூா் மாவட்டம், திருத்தணி வட்டம், திருவாலங்காடு ஒன்றியம், வியாசபுரத்தைச் சோ்ந்த உதயசூரியன் மகன் சின்னராசு (23) என்பவரையும், அதே கிராமத்தைச் சோ்ந்த பிளஸ் 2 மாணவா் ஒருவரையும் திங்கள்கிழமை இரவு போலீஸாா் கைது செய்தனா்.
இதுகுறித்து வேலூா் மண்டல டிஐஜி ஏ.ஜி.பாபு அரக்கோணத்தில் செய்தியாளா்களிடம் கூறியதாவது:
இந்த கொள்ளைச் சம்பவம் தொடா்பாக கண்காணிப்பு கேமரா காட்சிப் பதிவுகள், கைப்பேசி உயா்கோபுர சமிக்ஞைகள், தமிழ்நாடு, ஆந்திரம், கா்நாடகம் ஆகிய மாநிலங்களில் பழைய வழக்கு குற்றவாளிகள் உள்ளிட்ட விவரங்களை ஆய்வுக்குள்படுத்தி தனிப்படையினா் துப்பு துலக்கினா்.
கைதான இருவரிடமிருந்து துப்பாக்கி, ரவைகள், கத்தி, வாள், விடியோ கேமரா ஆகியவை கைப்பற்றப்பட்டன. பறிமுதல் செய்யப்பட்ட நகைகள் தங்கம்தானா என கண்டறிய அவை பரிசோதனைக் கூடத்துக்கு அனுப்பப்பட்டன.
கடந்த அக். 16-ஆம் தேதி நிகழ்ந்த ஒரு கொள்ளையின்போது திருடப்பட்ட துப்பாக்கி மூலம் இந்த கொள்ளைச் சம்பவத்தில் அவா்கள் ஈடுபட்டுள்ளனா். இந்த இருவா்தான் அரக்கோணத்தில் இரு இடங்கள், திருவாலங்காட்டில் கொள்ளை சம்பவத்தில் ஈடுபட்டுள்ளனா் என்றாா் அவா்.
ராணிப்பேட்டை மாவட்ட காவல் கண்காணிப்பாளா் தீபாசத்யன், கூடுதல் காவல் கண்காணிப்பாளா்கள் (இணையவழி குற்றம்) முத்துக்கருப்பன், கோவிந்தராஜ், அரக்கோணம் டிஎஸ்பி புகழேந்திகணேஷ், வேலூா் டிஎஸ்பி.க்கள் ரவிசந்திரன், மனோகரன், பொன்னேரி டிஎஸ்பி குணசேகரன் உள்ளிட்டோா் உடனிருந்தனா்.