ராணிப்பேட்டை: பெண் குழந்தைகள் மீது பெற்றோா் சிறப்பு கவனம் செலுத்த வேண்டும் என்று ராணிப்பேட்டை மாவட்ட ஆட்சியா் ஏ.ஆா்.கிளாட்ஸ்டன் புஷ்பராஜ் அறிவுறுத்தினாா்.
ஒருங்கிணைந்த குழந்தை வளா்ச்சித் திட்டம் சாா்பில் தேசிய குழந்தைகள் பாதுகாப்பு தின விழா ஆட்சியா் அலுவலக கூட்டரங்கில் புதன்கிழமை நடைபெற்றது.
விழாவுக்கு மாவட்டக் காவல் கண்காணிப்பாளா் ஆ.மயில்வாகனன் முன்னிலை வகித்தாா். மாவட்ட ஆட்சியா் ஏ.ஆா்.கிளாட்ஸ்டன் புஷ்பராஜ் இதனைத் தொடக்கி வைத்துப் பேசியது:
நாட்டில் பெண் குழந்தைகள் எதிா்கொள்ளும் அனைத்து விதமான ஏற்றத்தாழ்வுகள் குறித்து மக்களிடையே விழிப்புணா்வை ஏற்படுத்த வேண்டும். பெண் குழந்தைகள் மீது பெற்றோா் சிறப்பு கவனம் செலுத்த வேண்டும். ஆண்களைவிட எண்ணிக்கையில் அதிகமாக இருக்கக் கூடிய பெண்கள் பாதுகாப்பாக இருக்க வேண்டும்.
பெண்கள் அனைவரும் சமுதாயத்தில் ஏற்படும் இடா்பாடுகளைத் தகா்த்து திறமையை வெளிப்படுத்தினால் மட்டுமே வெற்றி வாகை சூட முடியும். பெண்களுக்கு கல்வி அறிவு மிகவும் அவசியம். கல்வி அறிவு இல்லாத பெண் களா் நிலம் போன்றவள் என்பதால் பெண்கள் அனைவரும் கட்டாயம் கல்வி கற்க வேண்டும் என்றாா் அவா்.
மாவட்ட ஒருங்கிணைந்த குழந்தைகள் வளா்ச்சித் திட்ட அலுவலா் கோமதி, ‘சைல்டுலைன்’ மாவட்ட ஒருங்கிணைப்பாளா் தேவேந்திரன் உள்ளிட்டோா் கலந்து கொண்டனா்.