இந்திய கடற்படைக்காக ரஷியாவில் உருவாக்கப்படும் எதிரி நாட்டு நீா்மூழ்கி கப்பல்களைத் தாக்கும் அதிநவீன காமோவ்- 28 ரக ஹெலிகாப்டா்கள் 2024-க்குள் தயாராகிவிடும் என இந்திய கடற்படை கிழக்கு பிராந்திய துணைத் தளபதி சஞ்சய் வாத்சாயன் தெரிவித்தாா்.
அரக்கோணம் ஐஎன்எஸ் ராஜாளி கடற்படை விமான தளத்தில் உள்ள ஹெலிகாப்டா் விமானிகள் பயிற்சிப் பள்ளியில் பயிற்சி முடித்த 7 விமானிகளுக்கான பயிற்சி நிறைவு விழா வெள்ளிக்கிழமை நடைபெற்றது. விழாவில், இந்திய கடற்படை கிழக்கு பிராந்திய துணைத் தளபதி சஞ்சய்வாத்சாயன் பேசியது:
தற்போது நடைமுறையில் உள்ள புவிசாா் மற்றும் பாதுகாப்பு சூழல் இந்தோ பசிபிக் பிராந்தியத்தை நோக்கி ஒரு தனித்துவமான கவனத்தை செலுத்த வைக்கிறது. கடற்கொள்ளை, மனித கடத்தல் போன்ற நாடு கடந்த குற்றங்களின் அதிகரிப்பு ஆகியவை நமது ஸ்திரத்தன்மையை அச்சுறுத்துவது போல் இருந்தாலும், நமது கடற்படை மற்றும் கடற்படையின் விமானப் போக்குவரத்து எந்த சவாலுக்கும் பதிலளிக்கும் வகையில் பயிற்சி பெற்ற வீரா்கள் மற்றும் ஆயுதங்களுடன் தயாராக உள்ளது.
எதிரி நாட்டு நீா் மூழ்கிக் கப்பல்களைத் தாக்கும் அதிநவீன ஹெலிகாப்டரான காமோவ் -28 ரக ஹெலிகாப்டா்கள் மறுசீரமைப்பு ரஷியாவில் மேற்கொள்ளப்படுகிறது. இந்தியாவில் எதிா்பாா்க்கப்படும் ஏா் பிரேம்களுடன் முழுத்தொகுப்பு ஆகஸ்ட் 2022-க்குள் மேம்படுத்தப்பட்டு விடும். இதில் 10 காமோவ் -28 ரக ஹெலிகாப்டா்கள் இந்திய கடற்படைக்காக ரஷியாவில் 2024-க்குள் தயாராகிவிடும் என்றாா் அவா்.
விழாவுக்கு, ஐஎன்எஸ் ராஜாளியின் கமாண்டிங் ஆபீஸா் கமோடா் ஆா்.வினோத்குமாா் தலைமை வகித்தாா். பயிற்சி முடித்த கடற்படையின் ஏழு விமானிகளுக்கு சான்றிதழையும், மேலும் அனைத்துப் பயிற்சிகளிலும் சிறந்து விளங்கிய விமான சப் லெப்டினன்ட் வம்சிகிருஷ்ணாவுக்கு கேரள ஆளுநரின் சுழற்கோப்பை, கிழக்கு பிராந்திய கடற்படை தலைவரின் சுழற்கோப்பை, குண்டே நினைவு புத்தகப் பரிசு ஆகியவற்றை துணை தளபதி சஞ்சய்வாத்சாயன் வழங்கினாா்.
முன்னதாக கடற்படை வீரா்களின் அணிவகுப்பை அவா் ஏற்றுக் கொண்டாா்.