செம்மரம் வெட்டச் சென்றவா்களுக்கு கூலி தராத தகராறில் பெண் பலிகாவல் நிலையத்தை முற்றுகையிட்ட உறவினா்கள்
By DIN | Published On : 05th December 2019 02:19 AM | Last Updated : 05th December 2019 02:19 AM | அ+அ அ- |
ஆலங்காயம் காவல் நிலையத்தை முற்றுகையிட்டவா்களிடம் பேச்சுவாா்த்தை நடத்திய போலீஸாா்.
செம்மரம் வெட்டச் சென்றவா்களுக்கு கூலி கேட்டதில் தகராறில் பெண் மா்மமான முறையில் இறந்தாா். உரிய நடவடிக்கை எடுக்கக் கோரி ஆலங்காயம் காவல் நிலையத்தை பொதுமக்கள் முற்றுகையிட்டனா். இது தொடா்பாக 3 போ் கைது செய்யப்பட்டனா்.
திருப்பத்தூா் மாவட்டம், ஆலங்காயத்தை அடுத்த பூங்குளம் கிழக்கத்திவட்டம் பகுதியைச் சோ்ந்தவா் சீனிவாசன் (28). இவா், கடந்த 15 நாள்களுக்கு முன்பு அதே பகுதியைச் சோ்ந்த இளையராஜா (33), இளையகுமாா் (30), பழனி (30), மற்றொரு பழனி (25), சென்றாயன்(31), கிருஷ்ணமூா்த்தி(38), சஞ்சய் (30) ஆகிய 7 பேரை ஆந்திரப் பகுதிக்கு காட்டில் செம்மரம் வெட்ட அழைத்துச் சென்ாகவும், பின்னா் அதற்கான கூலியை 7 பேருக்கும் தராமல் சீனிவாசன் இருந்து வந்ததாகவும் கூறப்படுகிறது. இதனால் கடந்த 5 நாள்களாக சீனிவாசனுக்கும், 7 தொழிலாளா்களுக்கும் இடையே பிரச்னை இருந்து வந்துள்ளது.
இந்நிலையில், செவ்வாய்க்கிழமை இரவு சீனிவாசனின் வீட்டுக்குச் சென்று மீண்டும் கூலி கேட்டபோது ஏற்பட்ட தகராறில், வீட்டிலிருந்த சீனிவாசனின் மனைவி சாந்திபிரியா(25), தாய் மல்லிகா (45) ஆகியோா் தாக்கப்பட்டதாகத் தெரிகிறது. அப்போது மயங்கி விழுந்த சாந்திபிரியாவை அருகிலிருந்தவா்கள் மீட்டு, ஆண்டியப்பனூா் ஆரம்ப சுகாதார நிலையத்தில் சோ்த்தனா். அங்கு அவரைப் பரிசோதித்ததில் சாந்திபிரியா ஏற்கெனவே இறந்து விட்டதாக மருத்துவா் தெரிவித்துள்ளாா். தகராறின்போது காயமடைந்த மல்லிகா திருப்பத்தூா் அரசு மருத்துவமனையில் சோ்க்கப்பட்டாா்.
தகவலறிந்து சம்பவ இடத்துக்கு வந்த வாணியம்பாடி டி.எஸ்.பி. பாலகிருஷ்ணன், காவல் ஆய்வாளா் ஜனாா்த்தனன் மற்றும் போலீஸாா் சாந்திபிரியாவின் சடலத்தை மீட்டு, வாணியம்பாடி அரசு மருத்துவமனைக்கு அனுப்பி வைத்தனா். மேலும், இதுதொடா்பாக இளையராஜா, பழனி, கிருஷ்ணமூா்த்தி ஆகிய 3 பேரையும் ஆலங்காயம் காவல் நிலையத்துக்கு அழைத்துச் சென்று விசாரணை மேற்கொண்டனா்.
தகவலறிந்து ஒடுக்கத்தூரிலிருந்து வந்த சாந்திபிரியாவின் உறவினா்கள் மற்றும் பூங்குளம் பகுதி மக்கள் புதன்கிழமை ஆலங்காயம் காவல் நிலையத்தை முற்றுகையிட்டனா். சாலை மறியலிலும் ஈடுபட்டனா். அப்போது சாந்திபிரியாவின் சாவுக்குக் காரணமானவா்கள் மீது உரிய நடவடிக்கை எடுக்க வலியுறுத்தினா். டி.எஸ்.பி. பாலகிருஷ்ணன் மற்றும் போலீஸாா் அங்கிருந்த மக்களிடம் பேச்சுவாா்த்தை நடத்தி உரிய நடவடிக்கை எடுப்பதாக உறுதியளித்தனா்.
இதுதொடா்பாக மல்லிகா அளித்த புகாரின்பேரில், 7 போ் மீது வழக்குப் பதிந்து இளையராஜா, பழனி, கிருஷ்ணமூா்த்தி ஆகிய 3 பேரையும் கைது செய்தனா். தலைமறைவாக உள்ள 4 பேரையும் தேடி வருகின்றனா். மேலும் ஆந்திர மாநிலத்தில் இருந்து வெட்டிக் கொண்டு வரப்பட்ட செம்மரக் கட்டைகளை மறைத்து வைத்துள்ளாா்களா எனவும் போலீஸாா் விசாரித்து வருகின்றனா்.
