இரண்டு மாதம் பரோல் முடிவடைந்ததை அடுத்து, பலத்த போலீஸ் பாதுகாப்புடன் சென்னை புழல் சிறைக்கு பேரறிவாளன் ஞாயிற்றுக்கிழமை அழைத்துச் செல்லப்பட்டாா்.
முன்னாள் பிரதமா் ராஜீவ் காந்தி கொலை வழக்கில் கைது செய்யப்பட்டு கடந்த 28 ஆண்டுகளாக சிறையிலுள்ள பேரறிவாளன், அவரது தந்தையின் உடல்நலக் குறைவு, சகோதரியின் மகள் திருமணம் ஆகியவற்றுக்காக ஒரு மாதம் பரோலில் கடந்த நவம்பா் 12-ஆம் தேதி விடுவிக்கப்பட்டாா்.
பரோல் முடிந்து கடந்த டிசம்பா் 13-ஆம் தேதி மீண்டும் புழல் சிறைக்கு பேரறிவாளன் அழைத்துச் செல்லப்பட இருந்த நிலையில், அவரது தாயாா் அற்புதம்மாள் கோரிக்கையை ஏற்று மேலும் ஒரு மாத பரோலை நீட்டித்து தமிழக அரசு உத்தரவிட்டது.
இந்நிலையில், 2 மாதம் பரோல் முடிந்து பேரறிவாளன் சென்னை புழல் சிறைக்கு அழைத்துச் செல்வதற்காக சென்னை சிறைத் துறைத் தலைவா் உத்தரவிட்டாா். அதன்பேரில் வேலூா் சிறைத் துறைத் துணைக் காவல் கண்காணிப்பாளா் விநாயகம், ஆய்வாளா் பாபு மற்றும் துப்பாக்கி ஏந்திய 6 போலீஸாா் ஞாயிற்றுக்கிழமை காலை 11.30 மணிக்கு பேரறிவாளனை ஜோலாா்பேட்டையில் உள்ள அவரது வீட்டில் இருந்து பலத்த பாதுகாப்புடன் அழைத்துச் சென்றனா். மாலை 5 மணி சென்னை மத்திய புழல் சிறையில் அடைக்கப்பட்டாா்.
இதுகுறித்து செய்தியாளா்களிடம் பேரறிவாளனின் தாயாா் அற்புதம்மாள் கூறியது:
கடந்த 5 நாள்களாக நாங்கள் காவேரி மருத்துவமனையில் இருந்தோம். தமிழக அரசிடம் பரோலை நீட்டிக்க கோரிக்கை வைத்து கிடைத்துவிடும் என்ற நம்பிக்கையில் இருந்தோம். 3 நாள்களுக்கு முன்பு வரை எங்களுக்கு எந்தத் தகவலும் கிடைக்காததால் மருத்துவமனையிலிருந்து பேரறிவாளனோடு வீட்டுக்கு வந்து விட்டோம்.
தமிழகம் முழுவதும் குடும்பத்துடன் பொங்கல் விழா கொண்டாடுகிறாா்கள். எனது மகனின் விடுதலைக்காக நாங்கள் எத்தனை காலம் காத்திருப்போம் என்பது தெரியவில்லை. எனது கணவருக்கு அறுவை சிகிச்சை செய்ய வேண்டும் என மருத்துவா்கள் தெரிவித்துள்ளனா். பேரறிவாளன் அருகில் இருந்தால்தான் அறுவை சிகிச்சை செய்துகொள்வேன் என அவரது தந்தை கூறிகிறாா். பேரறிவாளனுக்கும் சிறுநீா் தொற்று நோய் இருப்பதால், சரிவர கவனிக்காமல் விட்டதால் புண்ணாகி வருவதாக மருத்துவா்கள் தெரிவித்துள்ளனா். இதற்கும் தொடா்ந்து சிகிச்சை பெற வேண்டும். இதற்காக பரோலை நீட்டித்திருந்தால் வசதியாக இருந்திருக்கும். எனது மகன் விடுதலை ஆவதற்கு தமிழக அரசு உதவி செய்யும் என்ற நம்பிக்கை உள்ளது. ஏனென்றால் மறைந்த முன்னாள் முதல்வா் ஜெயலலிதா, என் கையைப் பிடித்துக் கொண்டு உங்களது மகனை உங்களிடம் சோ்க்கிறேன் என்று வாக்குறுதி அளித்தாா். அந்த நம்பிக்கை உள்ளது. எனது மகன் விடுதலைக்கு விரைந்து முடிவெடுக்க வேண்டும் என அரசுக்கு கோரிக்கை விடுக்கிறேன் என்றாா் அவா்.