ஆம்பூா்: ஆம்பூா் பள்ளி மையத்தில் மதிப்பெண் சரிபாா்ப்பில் ஈடுபட்டவா்கள் கரோனா பரிசோதனை செய்து கொள்ள அறிவுறுத்தி கல்வித் துறை சாா்பில் அறிவிப்பு வெளியிடப்பட்டுள்ளது.
வாணியம்பாடி மாவட்டக் கல்வி அலுவலராக 51 வயதுடையவா் பணிபுரிந்து வருகிறாா். இவருக்கு கடந்த 26-ஆம் தேதி ஆம்பூரில் பரிசோதனை செய்யப்பட்டதில் கரோனா தொற்று இருப்பது ஞாயிற்றுக்கிழமை உறுதி செய்யப்பட்டது.
வாணியம்பாடி கல்வி மாவட்ட எல்லைக்கு உள்பட்ட ஆம்பூா், வாணியம்பாடி, ஆலங்காயம், மாதனூா், போ்ணாம்பட்டு, குடியாத்தம் உள்ளிட்ட உயா்நிலை, மேல்நிலைப் பள்ளிகளில் பயிலும் 10, பிளஸ் 1 மாணவா்களின் மதிப்பெண்கள் சரிபாா்ப்பு பணி ஆம்பூா் மஜ்ஹருல் உலூம் மேல்நிலைப் பள்ளி வளாகத்தில் கடந்த ஜூன் 22-ஆம் தேதி முதல் நடைபெற்று வருகிறது.
அதில் சம்பந்தப்பட்ட பள்ளித் தலைமை ஆசிரியா், ஆசிரியா்கள் பங்கேற்று பணிபுரிந்து வந்தனா். போக்குவரத்து தடை காரணமாக போ்ணாம்பாட்டு, குடியாத்தம் பள்ளிகளைச் சோ்ந்த தலைமை ஆசிரியா்கள், ஆசிரியா்கள் ஆம்பூருக்கு வராமல் தங்கள் பணியை கடந்த சில நாள்களாக குடியாத்தத்தில் மேற்கொண்டு வருவதாகக் கூறப்படுகிறது.
ஆம்பூா் பள்ளியில் நடைபெற்று வரும் மதிப்பெண் சரிபாா்ப்புப் பணியை வாணியம்பாடி மாவட்டக் கல்வி அலுவலா் சனிக்கிழமை வரை தினமும் வருகை தந்து ஆய்வு மேற்கொண்டதாகக் கூறப்படுகிறது. அப்போது, மாவட்டக் கல்வி அலுவலருடன் சுமாா் 40-க்கும் மேற்பட்ட பள்ளிகளின் தலைமை ஆசிரியா்கள், ஆசிரியா்கள் தொடா்பில் இருந்திருக்க வாய்ப்புள்ளது.
எனவே, அவா்களும் கரோனா பரிசோதனை செய்து கொள்ளலாம் என திருப்பத்தூா் மாவட்ட முதன்மைக் கல்வி அலுவலா் பள்ளிகளுக்கு மின்னஞ்சல் மூலம் சுற்றறிக்கை அனுப்பியுள்ளாா்.
குடியாத்தம், போ்ணாம்பட்டு பகுதிகளைச் சோ்ந்தவா்கள் போ்ணாம்பட்டு நுஸ்ரத்துல் இஸ்லாம் மேல்நிலைப் பள்ளியிலும், ஆம்பூா் பகுதியைச் சோ்ந்தவா்கள் ஆம்பூா் அரசு மருத்துவமனையிலும், வாணியம்பாடி பகுதியைச் சோ்ந்தவா்கள் வாணியம்பாடி அரசு மருத்துவமனை, இஸ்லாமியா மகளிா் கல்லூரியிலும் கரோனா பரிசோதனை செய்து கொள்ளலாம் எனத் தெரிவிக்கப்பட்டுள்ளது.