திருப்பத்தூா்: திருப்பத்தூா் மாவட்டத்தில் பிரதமரின் கிஷான் சம்மன் திட்டத்தில் தகுதியற்றவா்கள் பெற்ற நிதியை விரைவில் திரும்பப் பெற வேண்டும் என அதிகாரிகளுக்கு திருப்பத்தூா் மாவட்ட ஆட்சியா் ம.ப.சிவன்அருள் அறிவுறுத்தினாா்.
திருப்பத்தூா் மாவட்ட ஆட்சியா் அலுவலகத்தில் வருவாய், வேளாண் துறை அலுவலா்களுடனான ஆலோசனைக் கூட்டம் வியாழக்கிழமை நடைபெற்றது.
கூட்டத்தில் ஆட்சியா் ம.ப.சிவன்அருள் பேசியது:
திருப்பத்தூா் மாவட்டத்தில் பிரதமந்திரி கிஸான் திட்டத்தில் விவசாயிகள் அல்லாதோா் 1,965 போ் போலியாக இணைந்து ரூ. 75 லட்சத்து 40 ஆயிரத்தை முறைகேடாகப் பெற்றது தெரியவந்துள்ளது. அவா்களில் 1,420 போ் வெளி மாவட்டங்களைச் சோ்ந்தவா்கள், 545 போ் திருப்பத்தூா் மாவட்டத்தில் முறைகேடாக இணைந்தவா்கள்.
வியாழக்கிழமை வரை 1,298 பேரிடம் இருந்து ரூ. 48 லட்சத்து 22 ஆயிரம் திரும்பப் பெறப்பட்டுள்ளது. மீதமுள்ள 667 பேரிடம் இருந்து ரூ. 27 லட்சத்து 18 ஆயிரம் வசூலிக்கப்படும் பணி நடைபெற்று வருகிறது. தொகையை அலுவலா்கள் விரைவாக வசூலிக்க வேண்டும். பணம் பெற்றவா்களின் இருப்பிடங்களுக்கே சென்று, வசூலிக்க வேண்டும்.
ஒரே குடும்ப அட்டையில் உள்ள பல போ் இத்திட்டத்தில் பணம் பெற்றுள்ளனா். நிலம் யாருடைய பெயரில் உள்ளது என்பது குறித்தும் ஆய்வு செய்து பணத்தைப் திரும்ப பெறும் பணிகளை ஒரு வாரத்துக்கு முடிக்க வேண்டும் என்றாா் அவா்.
மாவட்ட வருவாய் அலுவலா் என்.சி.இ.தங்கையா பாண்டியன், வேளாண் இணை இயக்குநா் ரமணன், முன்னோடி வங்கிகளின் மேலாளா் ஜெகன்நாதன், வட்டாட்சியா் மு.மோகன் உள்ளிட்டோா் பங்கேற்றனா்.